United manager thar The Special One?

1990 FA Cup final-ah Manchester United-in Cyrstal Palace hnehin Alex Ferguson hnuaia a vawi khat nan nomawi an chawi. 2016 FA Cup final-ah Eagles tho hneh-in Louis van Gaal-a hnuaia a vawi khat nan United-in nomawi an chawi a, amaherawhchu Scottish manager hnung zuiin Dutch manager-in a hna a hum thei lo.

Manchester United official-in manager thar hi la puang lo mah se English football ziaktu zinga rintlak ber BBC chuan Van Gaal thlak turin Chelsea duh loh Jose Mourinho a chian tawh thu an ziak.

Thutlukna mak?

United-in champion duhin Dutch manager hnuaiah hian pound maktaduai 250 chuang an hmang tawh a, Premier League-ah palina leh pangana an ni pha ṭawk.

Van Gaal hian United hi FA Cup-ah champion pui mah se supporter tam takin Dutch manager hi ban an duhna a rei tawh. Red Devils-in Van Gaal an ban hrim hrim hi a mak lo a, chutihrualin champion pawh lawm hman loa Dutch manager an siam erawh demtu an tam hle.

BBC Sports editor Dan Roan chuan final khelh laiin United-in Thawhṭanniah Van Gaal an ban tur thu leh Thawhlehnia Mourinho an lakluh tur thu chu twitter-ah a ziak tawh. Champion aia a hmalam hun chungchang an zawh nasat avangin Van Gaal hi press conference aṭangin a chhuak tau hial.

Nomawi nen

Van Gaal-a'n season thum atan contract a ziak a, season khat hmang zo loin United a chhuahsan dawn. Dutch manager hi a result leh a khelh dan hmuhnawm lo tak avang-in sawisel nasa mah se United-ah rawlthar ṭha-hnem tak khelhna hmun a pek avangin an fak dawn.

Hei chauh hi a ni lo, Dutch manager hian United hi kum 2004 hnua a vawi khat nan FA Cup-ah a champion pui a, hawi hniam lutuk tur erawh a ni bik lo.

Special One

Manchester United hotute ngaihdan a inang lo, report ṭhenkhatah chuan club legend Ryan Giggs chu Van Gaal-a thlak tura duhtu an tam a, a tawpa an thlan tak erawh 'The Special One' tia mahni inchhal ngam Jose Mourinho a ni.

Final khelh hmain United leh Mourinho hi a thuphungin an inrem tawh a, amaherawhchu Portuguese manager hian Van Gaal a thlak tur thu hi a pha thung. Real Madrid manager hlui hian Premier League-a Chelsea a champion pui aṭanga thla sarihnaa London club-in an ban a, nikum December thla hnu khan Portuguese manager hian club a enkawl a nei leh lo.

February thla khan United hotute leh Mourinho hi an inbia niin thuthang a awm a, khami ṭuma mi kha thudik pawh lo ni ta lo reng pawh ni se engkim a chiang hnai e. Season thara Manchester United manager tur chu Jose Mourinho a tih ngam tawh.