Zlatan-a'n ropui takin PSG a mangtha

Paris Saint Germain-in tun season-a an league match hnuhnung ber an khelh hma khan season tawp ruala chhuak tur Zlatan Ibrahimovic chuan, "Lal angin he hmunah hian ka lo kal a, hriatreng tawh turin ka liam leh dawn a ni," a ti a, Swedish striker hian Pathianni zan khan a thusawi dikna a thlentir.

French club tana a match hnuhnung berah Zlatan hian goal hnih a khung a, Coupe de France-ah PSG chu Marseille lakah 4-2 a hnehna chanpuiin nomawi chawi chungin khelmual chhungah a hun a hmang.

PSG tan Ibrahimovic bakah Blaise Matuidi leh Edinson Cavani-ten goal khat ve ve an khung bawk a, Marseille tana Florian Thauvin leh Michy Batshuayi-te goal khungin awmzia a nei thui lo.

Laurent Blanc-a nauten Champions League semifinal lut zo lo mah se France-a nomawi hui theih zawng zawng erawh an hui kim vek a, Trophee des Champions (Super Cup), Coupe de la Ligue (League Cup), Ligue 1 leh Coupe de France (French Cup)-ah te champion vekin season hnih chhung heng inelna paliah te hian a zawnin an champion ta!

Zlatan a ropui

Kum 2012 khan Zlatan-a'n AC Milan aṭangin PSG a pan a, season li a hman zawh meuh chuan PSG tan an club chanchina goal khung hnem ber nichungin French club hi a mangṭha.

Swedish striker hian PSG tan inelna hrang hrangah match 180 khelin goal 156 a khung hman a, tun season bikah match 51-a inlanah goal 50 khungin PSG chanchinah club tan season khata goal 50 khung tling thei hmasa ber a ni.

A nungchang maksak tak avanga lawm leh huat hlawh Zlatan hian tun season league match bikah vawi 31 inlanin goal 38 a khung a, Ligue 1 top scorer ni chungin season a khar.

France-a pan hnuah Zlatan hian amah khing zotu a tawng lo a ni ber - season li a cham chhungin Ligue 1 Team of the Year-ah a lang kim vek a, season thum chhung top scorer niin Ligue 1 Player of the Year-ah vawi thum thlan a ni bawk!

Zlatan-a tan France-a a kum ṭhat loh ber kum tia sawi theih chu season hmasa kha a ni a, inelna hrang hranga match 37 a inlanah goal 30 a khung - striker tam tak tan chuan inchhuanna tham a la ni tho.

Khawiah nge Zlatan?

Juventus, Inter Milan, Barce-lona leh AC Milan tan pawha lo khel tawh striker hi a chhuak dawn tih sawi thawm a awm rualin khawthlang media-te chuan a kalna tur lam an inrinsiak leh der tawh a, kum 34 laia upa ni tawh mah se a thiam a la theihnghilh loh miau avangin duhtu club an tam a, heng zingah hian Manchester United hming a ri ring hle - media ṭhenkhat chuan United hian Old Trafford-a kum khat khel turin Zlatan hi an dawr tawh niin an tarlang hial.

Hei hi thil awm thei a ni - Jose Mourinho chu Manchester United manager a ni thuai dawn niin BBC chuan a tarlang a, manager induh tawk ve tak leh ṭawngkam bungraw ngah tak Mourinho leh huaikawmbawl ching Zlatan hi Inter Milan-ah an lo thawkdun tawh a, Portuguese manager hian a la lut a nih ngat chuan manager leh striker chanchin ngah tak inkawp leh tur hi khawvelin a hmu chak khawp ang.

Footballer-ten an hun tawp lam hman nan USA emaw Middle East club lam an hawi
ṭhin. Zlatan pawh kum upa tawh lam a nih avangin sum tamna lam ram hian a lung a len nia sawi a ni a - LA Galaxy chu Swedish striker hnim hnai bertu nia ngaih an ni. Steven Gerrard-a khelhna club hian pawisa hman tur an ngah tih a chiang a, Los Angeles club hian Zlatan hi kar khata PSG-a a hlawh zat £400,000 hlawh tir an inhuam ni hiala sawi thawm a awm bakah Paris khawpuiah LA Galaxy scout hmuh a ni - sawizawm an ni hi a awm lo hran lo.