New York Derby-ah Lampard an au el

Pathianni zan Major League Soccer-ah New York Derby khelh a ni a, New York Red Bulls laka 7-0 a Frank Lampard-a khelhna New York City an tlawm zanah hian English midfielder hi fan-ten nasa takin an au el.

Kum 37-a upa Lampard hi chawn hliam vangin a chawl reng a, Pathianni zan a inlan hi tun season-a a club tana a hmel a lanna hmasa ber niin minute 15 chauh a awm tawh tihah Andre Pirlo a thlak a, Italian legend a thlak lai hian 5-0 in an chak lo mek!

Lampard-a'n kum khatah pound maktaduai 4.1 vel a hlawh a, Chelsea legend hlawh zat hi New York Red Bulls squad pumpui hlawh aiin a tam zawk - Red Bulls player hlawh hnem ber chu kum khata £448,000 hlawhtu Bradley Wright-Phillips niin Shaun Wright-Phillips-a unaupa hian New York City an insawpna inkhelah hian goal hnih a khung.

Arsenal legend Patrick Vieira-a enkawl New York City hi MLS-a sum hmang nasa ber pawl an ni a, Pathianni zana inlan an player langsar pathum Andrea Pirlo, David Villa leh Frank Lampard-te hi MLS player hlawh hnem zual 10 zinga lang phak vek an ni.

Sum hmang hnem New York City-in record duhawm lo an nihrual a, MSL chanchina tlawm chiang ber record pahnih Los Angeles Galaxy-in kum 1998-a Dallas Burn 8-1 a an sawp leh Chicago Fire-in kum 2001-a Kansas City Wizards 7-0 a an sawp chu an nihrual.