Tevez leh Dybala tan hmun a awm lo

Argentina coach Gerardo Martino chuan Copa America Centenario khel tur player 23 hming a ti chiang ta a, Carlos Tevez leh Paulo Dybala te bakah Pablo Zabaleta tan hmun a awm ve lo.

Boca Juniors star Tevez leh Juventus hmatawng Dybala tel lo pawh hian Argentina hian Lionel Messi, Sergio Aguero leh Gonzalo Higuain te an la neih avangin tlarhma lamah chuan player an nei ṭha thawkhawt tura ngaih a ni. Season ṭan dawn khan Ezequiel Lavezzi chuan Chinese Super League lam pan mah se Martino chuan a la ko tel bawk.

Argentina hi Copa America neih hnuhnung paliah ṭum thum ngawt pahnihna an ni a, kuminah pawh hian champion tura rinkai zinga mi an ni. Mahse, tlarhma lam an neih chhah ang ai hian a hnunglam an khawng tawk lo fo. Manchester United tana khel phak lo Sergio Romero chu first keeper tura ngaih niin Manchester City defender Nicolas Otamendi bakah Marcos Rojo leh Ramiro Funes Mori te chu an innghana tur an ni ang.

Argentina hian Group D-ah Panama leh Bolivia bakah champion lai Chile te an hmachhawn dawn a ni.