Scottish Cup. Hibs champion zanah buaina a chhuak

Inrinni zan Scottish Cup final-ah Hibernian chuan 3-2 in Rangers an hneh a, kum 114 hnuah Scottish Cup champion an ni ve leh ta!

Hibs tan Anthony Stokes-an goal hmahruai a khung hnuah Rangers-in Kenny Miller leh Andy Halliday-te hmangin an chhanglet a, champion tur angin an lang hman.

Mahse, Hibs-in team huaisen zia chhuahin minute 80-naah Stokes hmang bawkin an si phurh an sut a, injury time-ah David Gray-a'n goal dang a khung leh bawk avangin Rangers tan an si phurh sutna hun a awm tawh lo.

Inkhelh zawhah kum 100 chuang Scottish Cup nomawi chawi tawh lo Hibernian fan-ten awmdan tawk an thiam lo a, khelmual chhungah tlanlutin an sapatal a, buaina hial a chhuak.

Rangers chuan in-khelh zawhah Hibs fan-te chet dan chu mawi lo leh zahpuiawm an tih thu an puang chhuak nghal a, Scottish Football Association chuan Hibs fan-te chet dan chu uluk taka an chhui chian tur thu an sawi nghal bawk.