Fed Cup-a Mizo tihmingthatu Jeje. Mohun Bagan 5 - 0 Aizawl FC

Jeje Lalpekhlua khelhna Mohun Bagan chuan Federation Cup champion turin Inrinni zan khan Indira Gandhi Stadium, Guwahati-ah Aizawl FC chu 5-0 in an sawp. Kolkata club hian kum 2008 hnua Fed Cup nomawi an chawi lehna hmasa ber a ni a, tun ṭum hi vawi 14 an champion-na niin anmahni hnaih bertu an hmelma East Bengal aiin vawi rukin an champion tam zawk.

Mariners leh MPL champion hi minute 45 chhung goal awm loa an inhnehtawk hnuah club ṭha danglamna second half-ah a lang. Player hlawh tam Sony Norde-a'n (48’) bul ṭanin Dhanachandra Singh (58’), Jeje Lalpekhlua (73’, 88’) leh Bikramjit Singh (82’) ten goal khung zuiin Sanjoy Sen hoten goal nga an khung.

Mizo club chetchhiat zanah Mizo tlangval Jeje a langsar a, Bagan striker hian goal hnih a khung bakah Norde goal khung tur a siam sak. Hnahthial tlangval hi hero of the match-ah thlan a ni a, tun inelnaah hian goal riat khungin record thar a siam bawk.

Sunday leh midang

Aizawl FC-in final an thlen theih nana goal li khungtu Joel Sunday chu hmatawngah a awm. Nigerian striker hnungah captain David Lalrinmuana awm loh vanga captain armband hrengtu Liberian forward Alfred Kemah Jaryan a awm.

Jahar Das-a'n team ṭha lo zawk an ni tih hriain defensive midfield-ah Yuta Kinowaki thlawp turin Lalruatthara a dah lut a, wing-ah Albert Zohmingmawia leh H. Lalmuankima te an awm. Tlarhnung khawih chet a ni lo a, Soram Porei chu goal vengtu niin Manpuri keeper hmaah Lalchhawnkima, Emma Chigozie, Lalramchullova leh Ricky Lalawmawma te an intlar bawk.

Bagan quartet

MPL champion an dam kim loh laiin Mohun Bagan erawh an dam kim vek a, Aizawl FC lama goal khung turin Sanjoy Sen-a'n a player chhuanvawr pali Jeje, Norde, Cornell Glen leh Yusa Katsumi te a rawn rem nghal. Norde hi Haiti-in Copa America khel tura an koh a ni a, Glen hi Trinidad and Tobago tana 2006 FIFA World Cup khel tawh a ni a, Katsumi hi Japanese club ṭha Sanfrecce Hiroshima chhuak niin an pali zinga goal khungtu ber Jeje hi Mizo tlangval a ni.

India team-a koh vanga Bagan-in RG Stadium-a an chhawr theih loh defender Pritam Kotal leh midfielder Pronay Halder ten Mariners tan inkhel bul an ṭan bawk.

AFC leh nomawi?

Ṭan phatah Katsumi leh Glen te thawhrah sengtu Norde-a'n chak taka ball la lutin Chullova a tlan pel a, Haitian winger siam chu Jeje-a'n goal-ah petin Aizawl FC an him hram.

Aizawl FC an insiamrem a, minute 45 chhunga team ṭha zawk chu Mizo club an ni. Winger MK-a ball cross Sunday-a'n a tauh hman loh chu goal awm theihna tur a ni a, Nigerian striker leh amah thlawptu Alfred te'n Bagan keeper Debjit Majumder hna an siam sak ve reng bawk.

MPL champion-in chance ṭha an nei a, he chance hi duhthusam a siam theitu captain David a awm loh avangin inkhela an chungnunna chu goal-ah an chantir thei lo. Aizawl FC banah phakah Fed Cup nomawi a awmah a ngaih theih.

Jeje Show

First half-a khelh thut lu hai pal-tlang hramtu Aizawl FC an insiamṭha lo a, second half ṭan chiahah an puitlin lohna a lang nawn. Field lai aṭanga minute 48-naa Bikramjit-a ball vawrh luh chu Nigerian defender Emma venna hnuaiah Jeje-a'n a awmin Norde tan ball duhthusam a siam sak a, Haitian winger hian a pet goal chiang hle. Defensive midfielder pahnih awm chunga player hlawh tam ber Norde-a'n vengtu a nei lo hi a mak a ni.

Minute 10 hnuah Katsumi corner chu ven ṭhat loh Dhanachandra Singh chuan a tauh lut leh a, Aizawl FC beisei a tawp a ni ber. Bengali coach Jahar Das-a'n risk lain Ruatthara aiah rawlthar Lalramzauva a dah lut a, goal tlarhnung a pawp zau sawt.

Minute 73-naah Jeje-a'n goal hmaah a 'sial' tih pholangin Glen-a siam chu goal sirah tak a dah a, goal mawi bik a nih avanga celebrate tham ni mah se Mizo club lama khung a nih avangin Jeje-a'n ṭhingṭhiin van lam a kawk a, amah siamsaktu Glen te erawhin pawisak tur an nei loh avangin an lawm nasa hle.

Aizawl FC tan Yuta, Sunday leh RZ-a ten vanneihna zawngin goal lam hawiin ṭha zetin pet vek mah se uiawm takin ball a kal ral vek. Bagan erawh an attack zawng zawng goal-ah a lut emaw tih mai tur a ni. AFC tlarhnung a pawp tawh avangin minute 82-naah Norde thawhrah chu Bikramjit-a'n a khung bakah minute 88-naah Jeje-a'n substitute Azharuddin Mullick cross ṭha tak chu a pet lut leh a, striker goal a ni.

Das-a thukhawchang

Aizawl FC coach Jahar Das chuan final khelh hmain history an siam tur thu a sawi a, Bengali coach beisei dan ni loin history an siam. Tun ṭum hi final-a insawp ber ṭum a ni a, 1979-80 season khan BSF-in Mafatlal Mills chu 3-0 in an sawp a, Mafatlal Mills record duhawm lo tak hi Aizawl FC chuan an khum ta a ni.

Mizo club coach Jahar Das chuan, "First half-ah khan kan khel ṭha em em a, player-te khan an rilru zawng zawngin an khel a ni. Amaherawhchu hun chanve hma lama chet ṭhat vang khan second half-ah kan tlukpuiah an ngai a, an tisual a ni. Bagan hi kan tlukpui an ni lo a, keini aia ṭha daih an nih avangin kan fimkhur lohna kha an hmang ṭangkai a ni. Goal kan chhuah hnu khan sut kan tum a, Mizorama nomawi hawn ngei kan tum avangin goal tam zawk kan chhuah phah a ni," tiin Vanglaini palai a hrilh.

Final-ah chak zo lo mah se Aizawl FC thlen chin hi a ropui a, I League aṭanga relegate chunga final an thleng hrim hrim hi a ropui. Mizo mipuiin an hriat reng tura ṭha chu Aizawl FC hian nikum Federation Cup champion leh I League champion thar Bengaluru FC an petchhuak a, final-ah chak tumin an khel bawk.