Mimal anga boo ka tawn vawi khatna - Jeje Lalpekhlua

Hnahthial tlangval Jeje Lalpekhlua'n I League leh Indian Super League a champion hnuah Federation Cup nomawi a chawi a, Mizo tlangval zinga inelna pathuma champion thei hmasa ber a ni.

Fed Cup-ah hian India striker zinga hming langsar ber Bhaichung Bhutia leh Jose Ramirez Barreto chuan inelna vawi khatah goal sarih an lo khung tawh a, Mariners striker Jeje hian tun ṭumah hian goal riat khungin top scorer a nih bakah player ropui pahnih record lo siam tawh chu a khum bawk.

India ram puma Mizote tihming-ṭhatu Jeje hi Guwahati-a Aizawl FC ṭantu Mizote'n zahna lantir loin an ṭan luatah an 'boo' thung.

Jeje chuan, "Ball ka chan hmasak ber aṭangin min boo nghal a, mak ka ti hle. Football career-ah hetiang hi ka la tawng ngai lo a, Mizoram club ṭantute lak
aṭangin ka beisei lo. Hrehawm ka ti em em a, amaherawhchu khelmual chhunga ka game tihbuai tir erawh ka tum lo," tiin field pawna thil thleng vanga a buai loh thu Vanglaini palai a hrilh.

Indira Gandhi Stadium-a Aizawl FC ṭan tura mipui pungkhawmte an fakawm a, inzir tur erawh an la nei. Boo hi chu club phatsantu emaw club laka chemawi lo player-te chunga supporter-te auh elna a ni.

Mipuite auh nawmnah Jeje erawh Aizawl FC chunga ṭhat chhuahtu a ni a, goal a khung pawh a lawm lo. Hnahthial tlangval hi football a khelh ṭantirh aṭangin Mizoram tihmingṭhatu a ni a, Mizoram junior team leh senior team (Santosh Trophy) tan theihtawp chhuahin professional football a luhchilh hnu thlenga Mizoram tihmingṭhatu a ni. India captain armband hreng tawh Jeje hian hian zah a phu zawk.

Mariners striker Jeje chuan, "Mizo-ram Football Association hi tun dinhmun ka thlen theih chhan a ni a, Mizoram hmingṭhatna atana khelh zel hi ka tih tur a ni," tiin Vanglaini palai a hrilh.

Hun tawpah erawh Jeje hian a phu ang tawk zahna a dawng a, Hero of the match chawimawina a dawn laiin inkhel entu Mizo mipuiin ding chungin kut bengin an lawm.