German Cup Bayern champion puitu Guardiola hun a tawp

Pep Guardiola chuan nomawi pahnih chawi chungin kum thum chhung a lo enkawl tawh Bayern Munich chu a mangṭha ta. Inrinni zan khan Bayern chuan Borussia Dortmund lakah penalty shootout hmangin 4-3 a hnehna changin German Cup champion an ni.

Bayern Munich hian April thla khan league nomawi lo chawi tawh bawkin Bundesliga-ah a zawna vawi li champion thei hmasa ber record an lo siam tawh a, German Cup-ah hian vawi 18 an champion-na chiah niin tun hnai kum li chhunga an ṭum thum champion-na a ni.

Goal a lut lo

Olympiastadion, Berlin-a inkhelah captain Mats Hummels-a'n Dortmund tan a match hnuhnung ber a khelh zanah khel ṭha thawkhat mah se minute 74-naah hliam vanga lakchhuah a ngai a, hun pangngai tawp hma minute nga chauh a awm tawh tihah Pierre-Emerick Aubameyang chuan goal khung theihna hun ṭha nei mah se a pet over hlauh.

Bayern lamin ball possesion 70% zet nei chungin goal zawnah vawi thum chiah an pet a, striker Robert Lewandowski ball pet hmuhnawm tak chu left back Erik Durm-a'n a lo dan sak bawk.

Hun pangngai leh extra time-ah pawh goal a luh loh avangin penaty hmanga chak zawk zawn a ṭul. Dortmund hian Shinji Kagawa hmangin khung mah se Sven Bender pet chu Manuel Neuer-a'n lo dan sak bakah Sokratis Papastathopouls chuan goal pawnah a pet bawk. Pierre-Emerick Aubameyang leh Marco Reus ten Dortmund tan khung ve leh mah se an chak zo lo.

Bayern tan Arturo Vidal leh Robert Lewandowski ten an khung hnuah Germany center-back Josh Kimmich chuan hlah ve mah se Thomas Muller leh Douglas Costa ten an khung zui avangin Bayern an chak.

Dortmund hian season hman zawh takah league-ah bik goal 82 khungin goal khung tam ber ni mah se an khingpui hi goal chhuah tlem ber Bayern (17) an nih miau avangin goal a lut lo hi a mak hran lo.

Pep a Puak

Kum 45-a upa Guardiola hian Spanish club lian Barcelona chu club inelnaa champion theihna zawng zawnga a champion pui hnuah kum 2013 khan Bayern Munich a zawm. Spanish mana-ger hian Allianz Arena-ah kum thum hun a hman chhungin Bundesliga title pathum bakah German Cup pahnih leh UEFA Super Cup leh FIFA Club World Cup te a lak pui hman a, sulhnu ropui tak hnut chhiahin season thar aṭang chuan Carlo Ancelotti-a'n a hmunruak hi a luah ang.

Kumin February thla tir khan Guardiola hian season tharah Manchester City a enkawl dawn thu a ti chiang tawh. A kalsan tur Bayern a ngaih thu sawiin, "He hmunah hian kum thum chhung hun hlimawm leh theihnghilh ngai tawh loh tur ka tawng a, ka hun tawp khar dan pawh hi duhthusam a ni. Ka player-te leh ka thawhpuite ka ngai dawn a, hun lo kal zel turah Bayern hian dinhmun ṭha an chan chhunzawm theih nan ka duhsakna sang ber ka hlan e," tiin lawma vanga mittui nen a hun hnuhnung a hmang.

Spanish manager chuan an khingpui chungchang sawi chhun-zawmin, "Dortmund khan tum dan leh ruahmanna fel tak an nei a, fak an phu. Mahse, keini lam khan kan thawhrim bakah ruahmanna kan neih ṭhat zawk avangin kan hmang ṭangkai. Penalty shootout-ah kha chuan thil engkim a thlen theih tawh avangin kan vannei hle," tiin a dan pangngaiin a inngaitlawm hle.

Tuchel tan a na

Season ṭan dawn kha chuan Thomas Tuchel hian eng ang dinhmunah nge Dortmund hi a hruait thlen ang tih kha ngaihtuah fe tham a ni a, mi tam zawkin German manager lakah beiseina an nei sang lutuk lo. Season kan hman liam taka khawvela manager langsar ber a nih lohna chu tlemte chauh a ni!

Mahse, kum 42-a upa Tuchel enkawlna hnuaiah Dortmund hi kum dang zawng aiin an khel hmuhnawm zawk emaw tih mai tur a ni a, Bundesliga-ah point 78 hmuin an club chanchina season khat chhunga league-a an point hmuh san ber ṭum a ni. Mahse, Guardiola naute an tluk loh avangin pahnihnaah an lungawi a ṭul. Europa League quarterfinal-ah an manager kalchhuak ta Jurgen Klopp kaihhruai Liverpool lakah 4-3 in an vanduai bawk.

German Cup bikah hian a zawnin final vawi thum an luhna a ni a, 2014 khan Bayern an hneh lo a, season hmasa khan Wolfsburg lakah tlawm bawkin kuminah Bayern bawk an ngam lo leh ta. Germany chauh pawh ni lo, Europe thleng pawh a team ṭha ni phak Dortmund vanneih ni hi a la herchhuak ve ngeiin a rinawm.

Borussia Dortmund coach Tuchel chuan, "Bayern lak
aṭangin zir tur kan la ngah hle tih a lang chiang, kan thawkrim tawk lo a, a pumpui thlir erawh chuan kan ti chhe hran lo," tiin a sawi.