Arsenal-in sum an theh chhuak. Hei le Xhaka
Kum 2005 hnuah Arsenal-in Premier League-ah pahnihna an hauh a, an chunga awm Leicester City hi tun season-ah vawi hnih an hneh. Gunners elpuiten manager thar aṭanga bul an ṭan laiin Arsene Wenger chuan champion ngei tumin player ṭha Borussia Mon-chengladbach captain Granit Xhaka aṭangin bul a ṭan.
Swiss midfielder Xhaka hi pound maktaduai 30 man vel tura ngaih niin tunkar tawp hian medical test a nei hman beisei a ni. British chanchinthar theh-darhtu rintlak BBC meuhin a tarlan tawh avangin Gunners ṭantute lawmna hi thuthang satliah ringawt a ni tawh lo.
Gunners hian season tawp rualin an midfielder pahnih Mikel Arteta leh Tomas Rosicky te an chhuah zalen a, Mathieu Flamini pawh chhuak tura ngaih a nih avangin an hmunruak hnawhkhat tur an mamawh a, Switzerland central midfielder hi an aiawh zo tur ringawt ni loin anni aia ṭha zawk tura ngaih a ni.
Arsenal hian kum 23-a upa Xhaka an lakluh thu hi la puang chiah lo mah se a inremna an nei fel thawkhawt tawh tih chu a hriat a, pound maktaduai 30-a an lei a nih chuan an club chanchina player manto pathumna a ni ang. Tun dinhmunah Mesut Ozil (£41.5m) hi Gunners player man to ber niin Alexis Sanchez (£35m) chu pahnihna a ni a, pathumna ni mek Jose Antonio Reyes (£17m) chu Xhaka hian a rawn khum dawn.
Xhaka hi 6 ft 1 in a sang a ni a, tharum angah bakah ball a thiam tel bawk. A kum la tam lo mah se 2011 aṭang khan Switzerland tan khel tura koh
ṭan niin match 40 a khelh aṭangin goal ruk a khung tawh.
Club lamah chuan Basel
aṭanga bul ṭanin kum 2012 khan German Bundesliga club ṭha Borussia Monchengladbach a zawm a, 2014-15 season khan league match 34 khel kim vekin Bundesliga team of the season-ah a hming a lang hial. Kum 2015 September 23 a herchhuah meuh chuan entawn tlak leh a player puite kaihruai theitu a nih zia tinghet turin team captain a ni der tawh! German club tan hian league match 102 khel tawhin goal ruk a khung tawh bawk.
2014 FIFA World Cup khan Xhaka hian Swiss tan a lo khel tawh a, Euro 2016 khel tur pawhin koh a ni. Premier League-ah Pep Guardiola, Jose Mourinho leh Antonio Conte te'n Manchester City, Manchester United leh Chelsea te an enkawl dawn a, Liverpool-in season bul aṭangin Jurgen Klopp a neih tawh dawn bakah Claudio Ranieri (Leiceister City) leh Mauricio Pochettino (Tottenham Hotspurs) te fiahin an awm dawn. Gunners-in sum an hmang ve ṭan tawh a, heti chunga tluk loh an nei zel nih chuan Arsene Wenger hi Arsenal manager a ni reng lo ang.