MotoGP Marquez hnehin Lorenzo a chak

Pathianni tlai khan Italian MotoGP tlan a ni a, intlansiak hmuhnawm bikah champion lai Jorge Lorenzo chuan Marc Marquez tlan pelin hnehna a chang.

Mugello-a intlan-siakah tun season tawp ruala Yamaha chhuahsana Ducati zawm tur Lorenzo-a'n pole position aṭanga bul ṭan Valentino Rossi chu kawng kawi hmasa berah a tlan pel nghal a, kum 37-a upa Rossi hi lap riatnaah a bike a chian loh avangin intlansiak a tlan tluan thei lo chhunzawm.

Kum 29-a upa Loren-zo hian fal takin hma a hruai chunzawm zel a, mahse lap hnih chauh tlan tur a awm tawh tihah 2013 leh 2014 champion Marquez chuan a rawn tlan pel a, lap hnuhnung ber an tlan laiin Yamaha leh Honda rider te hi nasa takin an in dang tawn a, a tawpah erawh Lorenzo-a'n second 0.019 chauhin hnehna a chang.

Spanish rider Lorenzo chuan, "Hmahruaitu ni tur khan ka theihna ka sawr bing nasa hle a, Marquez-a'n min rawn tlanpelh takah kha chuan pahnihna niha point hmuh kha ka duh tawk hman. Mahse, ka bike chak em avanga hnehna ka chang leh thei kha beisei piah lam a ni," tiin a sawi.

Tun season MotoGP intlansiak paruk awm tawh aṭangin Lorenzo hian ṭum thum hnehna a channa chiah a ni a, point 115 hmuin hmahruaitu a nih chhunzawm zel. Argentine leh American Grand Prix-a hnehna chang tawhtu Marquez chuan point 105 hmuin pahnihna dinhmun a luah bawk a, anni pahnih hnuaiah hian Valentino Rossi (78), Dani Pedrosa (66) leh Maverick Vinales (59) te an awm ve bawk.