Indian Premier League Playoff khel tur a chiang ta; Kohli a ropui zel

Twenty20 cricket hmanga inelna Indian Premier League hmawr an bawk hnai leh ta a, playoff a inlan tur team pali an hriat kim ta.

Inrinni zanah Sunrisers Hyde-rabad leh Gujarat Lions-ten playoff an lut tih a chiang tawh a, Pathianni zan khan Kolkata Knight Riders leh Royal Challengers Bangalore-te chuan an khingpui ve ve hnehin hmun ruak pahnih la awm an luah ve leh ta.

Pathianni zan IPL khelh a nih hmaa pahnihna Sunrisers Hyderabad erawh Kolkata an hneh loh avangin pathumnaah an lungawi a ṭul a, KKR-in playoff an luh phah thung.

KKR chakna Yusuf

Eden Gardens, Kolkata-a inkhelah mualneitu team tan Yusuf Pathan a langsar a, Indian batsman hian ball 34 lek a hmachhawnah run 52 siamin a tawp thleng a dam a, hmun hima Kolkata hruai thlengtu a ni. KKR hian over 20-ah run 171 siamin mi paruk chiah an hloh.

Sunrisers Hyderabad-in hnehna an chan chuan pahnihna ni chungin group stage an khar thei dawn tih an hria a, pahnihna tan playoff-ah final luh chance a ṭha zawk tih pawh an hria - mah se Hyderabad hian run 50 siamtu Shikhar Dhawan a out hnuah ngai an awh leh tawh lo. Over 20-ah run 149 chiah siama mi pariat hlohin run 22-in an target an umpha lo.

Hyderabad batsman-te tan Sunil Narine chu mangchhia a ni a, West Indies spin bowler hian over li a vawmah run 26 chiah pein wicket thum a la thei a ni.

Kohli a ropui

Indian batsman Virat Koh-li-a ropuina belhchhahin a awm zel a, Pathianni zan khan Delhi Daredevils lakah Royal Challengers Bangalore chu hnehna chanpuiin IPL khelh mekah run 919 zet a vaw chhuak tawh!

Raipur khawpuia inkhelah Delhi an bat hmasa zawk a, over 20-ah run 138 chauh siamin mi pariat an hloh a, run 60 siamtu Quinton de Kock chu player langsar ber a ni.

Royal Challengers Banga-lore-in over 18.1-ah an target umphain run 139 an siam a, mi pali chiah an hloh. RCB tan batsman langsar pahnih Chris Gayle ( 1 run) leh AB de Villiers (6 runs)-te che ṭha lo mah se captain Virat Kohli a awm a, Indian batsman hian run 54 siama a tawp thleng damin a team hi hnehna a chanpui.

Playoff chu

Indian Premier League-ah team pariat awmin an khelh kual vek hnuah a sang paliin playoff an lut. Playoff hi Qualifier 1 leh Eliminator round-ah ṭhen leh a ni.

Qualifier 1-ah pakhatna leh pahnihna an inhmachhawn ang a, a chak zawkin IPL final an lut nghal ang. A chak lo zawk hi Qualifier 2-ah an tla thla ang a, final luhna hun ṭha an la nei dawn tho.

Eliminator-ah pathumna leh palina team an intum ang a, a chak zawk hi Qualifier 2-ah Qualifier 1-a chak lo zawk hmachhawn turin an inhlangkai ang a, a chak zawkin final an lut ang. Eliminator-a chak lo team tan erawh IPL-ah beisei chhunzawm tur a awm tawh lo ang.

Inhmachhawn tur

Zanin dar 8:00-ah Gujarat Lions leh Royal Challengers Bangalore-te chu qualifier 1 khel turin an inhmachhawn dawn a, an inkhelhna tur hi M. Chinnaswamy Stadium, Bengaluru a nih avangin mahni khawtuala khel tur Bangalore club dinhmun a ṭha zawkah ngaih a ni.

Nilaini zan dar 8:00-ah Eliminator khelh a ni ve leh ang a, pathumna Sunrisers Hyderabad leh Kolkata Knight Riders an inhmachhawn ang.