NBA Playoff Thunder-in Warriors an ngam

Nimin zinga Western Conference Finals Game 3 inkhelah Oklahoma City Thunder chuan Golden State Warriors lakah 133-105 in hnehna an chang a, best of seven series-ah 2-1 in hma an hruai ta.

Chesapeake Energy Arena-a inkhelah Thunder tan Kevin Durant leh Russell Westbrook an khel ṭha takzet a, anni pahnih point hmuh belhkhawm hi 63 lai niin an thawhhlawk fal hle. Tun hmain NBA playoff-ah Thunder hian point 133 hi an la score tling ngai lo a, tun season playoff khelh mekah hian game pakhat bika point score hnem ber an la ni nghe nghe.

Thunder hian inkhel bul an ṭan ṭhat an chhawr ṭangkai a, quarter hmasa berah 34-28 a hmahruaiin first half a tawp meuh chuan 72-47 zetin an in-thlau tawh. Quarter lina an khelh zawh an in-thlauhna hi point 28 lai a ni!

Power forward Durant hian vawi 15 a shoot
aṭanga ṭum 10 lutin point 33 a nei thei a, freethrow vawi 12 a vawm chu lut fai vekin rebound vawi riat a la bawk. Point guard Westbrook-a'n point 30 a nei thung a, assists ṭum 12 nei bawk-in rebound vawi riat a la bawk a, rebound bik hi vawi hnihin la tam se la chuan triple-double a nei thei hial dawn tihna a ni.

Warriors tan Stephen Curry chu a langsar leh ber a, MVP hian point 24 score-in Klay Thompsom-a'n point 18 a nei ve bawk. Nilaini zing dar 6:30 hian Oklahoma khawpuiah Game 4 an khelh leh dawn a, Warriors tan chetsual a thiang tawh lo ang.