England-in Turkey an hneh
European Cham-pion-ship inpuah-chahna atana friendly match hmasa berah England-in Pathianni zan khan Etihad Stadium-ah Harry Kane leh Jamie Vardy te goal hmangin Turkey 2-1 in an hneh.
England hian Turkey vawi 11 an hmachhawnah a vawi khat nan goal an chhuah a, mikhual team goal hi Hakan Calhanoglu khung niin English keeper Joe Hart-a'n a tihtur a ti tawk lo!
Roy Hodgson-a hote hian Zirtawpni zan dar 12:15 hian Australia an hmachhawn leh ang a, June 2 zan dar 12:15-ah Portugal an khelhpui leh bawk ang.
Attacking trio
FA Cup champion Man-chester United for-ward Wayne Rooney leh Marcus Rashford te an inlan thei lo a, Europa League final-a goal khungtu Liverpool striker Daniel Sturridge te chhawr theihin an awm lo.
Hodgson-a'n 4-3-3 forma-tion hmangin a naute a rem a, Raheem Sterling leh Vardy chuan Kane an kar cheh. City winger Sterling-a'n ball a thiam a, Leicester hma tawng Vardy-a'n mual sir lama chet tlat a harsat deuh niin a lang.
Spurs striker Kane leh Dele Alli te club ang thoin England jersey an hak hnuah pawh an inthlawp ṭha hle. Minute thumna lekah Kane-a'n Dele Alli siam chu goal-ah a chantir a, offside ni mah se referee-in a pawm miau avangin Spurs striker class pholanin a awm.
Kane hian offside position aṭangin second half-ah a khung nawn a, assistant referee-in a hmuh tawh avangin goal-ah chhiar a ni lo. Spurs striker hian Vardy penalty hlawhchhuah chu goal-ah a chantir thei lo bawk.
Leicester champion puitu striker Vardy hi club tana a khelhpui Danny Drinkwater-a'n Sterling a thlak hnuah a tawlh hma hret a, a khel ṭha sawt bawk. Foxes striker Vardy hian minute 83-naah chakna goal a khung.
England hian Euro 2016 khel turin player 26 an ko a, player pathum paih tur a ni lo. Turkey hmachhawn ṭuma tlarhma pathumte hi chu final squad-ah an tel chiang ang.
Midfield lam
Tottenham midfielder Eric Dier hi Kane leh Dele Alli te awm vangin a hming langsar lo mah se a dam ṭhat phawt chuan England tan inkhel bul a ṭan ang.
Turkey nena an inkhelh ṭum hian Jack Wilshere a inlan a, tun season-a inhliam vanga inlan tam lo Arsenal midfielder a khel ṭha lo. Hodgson-a'n talent nei
ṭha bika a sawi hian a thiamna a pho chhuak lo a, amah thlaktu Liverpool captain Jordan Henderdon a danglam lo.
Leicester midfielder Danny Drink-water-a'n ram tan khelpha turin theihna a nei em tih zawhna hi chhanin a la awm lo a, Fabian Delph leh Ross Barkley a lut lo. England captain Wayne Rooney-a'n club lamah midfielder hna a chelh a, striker pahnih Sturridge leh Rashford te paih atan an uiawm bawk si avangin midfield lai
aṭang hian pakhat aia tam paih tur an awm dawn niin a lang.
La inpeih lo
England manager Roy Hodgson chuan, "Hun tam zawk kha chu kan khelṭhaah ka ngai a, chu chu a lawmawm lai a ni. Chutihrualin Euro 2016 khel tur meuh chuan kan la inpeih lo a, insiamṭhatna tur a la awm nual. Kan hmabak kar thum hi a pawimawh dawn a, tlarhnung tih khawng dan kan zir ṭhat a la ṭul a ni," tiin an
ṭhat dan bera an la khelh chhuah loh thu a sawi.
Euro 2016 hi June 11 aṭanga ṭan tur a ni a, England hi Group B-ah Russia, Slovakia leh Wales nen an awm. Roy Hodgson hote hian an match hmasa berah Russia an hmachhawn ang.