Copa del Rey champion Barcelona

La Liga champion Barcelona-in Pathianni zan khan Vicente Calderon, Madrid-ah Europa League champion Sevilla chu extra time-ah 2-0 in an hneh.

Beisei loh lam

Nikum August thla khan Spanish club pahnihte hi UEFA Super Cup-ah an intawng. Lionel Messi emaw Neymar emaw te chu inkhel hmawr bawk tura rinkai ni mah se khelhna hmun chan tam loh vanga Chelsea zawm ta Pedro chuan chakna goal a khung daih.

Intawn hmasak ṭum ang bawkin Messi, Neymar leh Luis Suarez te'n goal pawimawh ber an khung lo a, extra time minute 96-naa Jordi Alba goal chu inkhel thlak danglamtu a ni. Minute 122-naa Brazilian forward Neymar goal chu chak nemnghetna chauh a ni tawh.

Catalan club hian vawi 28 lai Copa del Rey nomawi chawi tawhin anmahni hnai bertu Athletic Bilbao-in vawi 23 chauh an la chawi. Bilbao champion hnuhnung ber hi 1984 daih tawh kha a ni a, Madrid khaw pahnih Real (19) leh Atletico (10) te erawh an la hnufual deuh.

Final chu...

Europa League final an khelhna a la rei lo nachungin Sevilla boss Unai Emery-a'n an ṭhat theih dan berin a luhtir a, hahdamna hun an nei tam lo. Luis Enrique-a'n an ṭhat dan berin Barcelona a luhtir tho a, anni erawh hahdamna hun nei an ni thung.

Barca midfielder Andres Iniesta-a'n upat lamah a vanglai a hmang nawn a, midfield a thunun bakah ball fing a pe lut fo. Uruguayan forward Suarez erawh a hriam tawk lo a, chu chu Sevilla tan vanneihna a ni.

Catalan club an chungnung a, amaherawhchu minute 36-naah Vicente Iborra ball pek chu Kevin Gameiro tan goal khung theihna a nih avangin Javier Mascherano-a'n box pawn chiahah a titlu a, Argentine defender hi red card pek a ni. Freekick hi Inter Milan pan tura sawi Ever Banega-a'n petin German keeper Marc-André ter Stegen-a'n a dan sak.

Sevilla hun

Red card vangin Enrique-a'n Ivan Rakitic la chhuakin defender Jeremy Mathieu a dah lut a, loh theih loin tlarhnung a thlak danglam tihna a ni.

Sevilla-in an tamna hmang
ṭangkaiin an goal nawr a na sawt a, Banega ball pet chuan Pique ke a fuh hnuah goal ban a per a, Barca an him hram.

Suarez chu inhliam vangin Rafinha-a'n a rawn thlak a, Messi-a'n freekick a hman
ṭangkai theih loh bawk avangin Sevilla chu team ṭha zawk an ni.

Hun tawp ham rik hma hretin Messi ball fing chu Neymar-a'n a chang a, Brazil striker tackle-tu Banega chu red card pek a ni.

Barca hun

Player 10 ve vea an khelh hnu--ah Barcelona an chungnung zawk a, Messi hna chu goal khung ni loin a khung turte pek a ni.

Minute 97-naah halfway line pelh hret aṭangin Messi-a'n midfielder ṭha bikte pet danin ball a vawrh lut a, left back Alba-a'n a pettu peh luh atana mawiin goal-ah a chantir. Sevilla-in siphurh sut tum mah se yellow card pahnihna hmuh vangin Daniel Carrico an chan a, minute 121-naah Messi ball fing bawk chu Neymar-a'n pet lut lehin Barcelona 2-0 in a chak.

Emery thukhawchang

Sevilla coach Unai Emery chuan, "Hun pawimawhah kan fimkhur tawk lo a ni. Second half-ah khan goal khung theihna tur chance hnih kan nei a, kan hmang ṭangkai lo ve ve. Amaherawhchu team
ṭha tak Barcelona kan el tawk a, ka player-te an hnathawhah ka chhuang em em a ni," tiin a sawi.

Khingpuite fak zuiin Emery chuan, "Game plan kan nei a, kan tum ber chu Barcelona player-te kha nuam sa taka awm tir loh a ni. Kan hna ṭha takin thawk mah ila a hunah tak Barcelona chu an danglam a, Copa del Rey a an hlawhtlinna hi ka lawmpui a ni," tiin a sawi.

Barca lam

Catalan club midfielder Iniesta chuan, "Season khar nana cup kan chawi hi a lawmawm a, kan club history kan tichangtlung chho zel a ni," tiin nomawi an chawi avangin a lawm tih a sawi.

Barcelona coach Luis Enrique chuan, "Player pakhata kan tlem avangin inkhelh a harsa em em a, amaherawhchu 10-a kan khelh hnuah tlarhnung lamah kan insiam ṭha bawk. Vawi khat champion hi a harsa a, kum zawna kan champion hi a lawmawm. Season tharah a zawna a vawi thum nan champion kan tum ang," tiin inkhel chungchang a sawi.

Season an hman dan sawiin Enrique chuan, "Nomawi chawi theih paruk aṭangin paliah kan champion a, chuvangin kan seasoon hman zawh tak hi a ṭha thawkhat hle a ni," tiin a sawi.

Catalan club hian hun rei zawk player 10-a khel chungin Sevilla lakah hnehna an chang. Tun season-ah La Liga, Copa del Rey, UEFA Super Cup leh FIFA Club World Cup-ah te an champion a, Champions League-ah champion nawn thei lo mah se Enrique hote hian season an hmang ṭha hle.