BCCI president thar Anurag Thakur

India ram cricket thuneitu sang ber Board of Control for Cricket in India chuan an president thar atan chuhtu awm loin Anurag Thakur an thlang. BCCI secretary hlui Thakur hian September 2017 thleng BCCI president hna hi a chelh ang. Kum 2013-a IPL eiruk thubuai chhui kawnga sawisel an hlawh avanga BCCI treasurer a nihna aṭanga bang Ajay Shirke chu secretary thar atan thlan a ni bawk.

Himachal Pradesh Cricket Association presi-dent ni bawk Thakur hi tun hnaia BCCI president pathumna a ni tawh. Nikum September khan president nilai Jagmohan Dalmiya chu a thih avangin a aiawh turin Shashank Manohar lakluh a ni a, mah se Shashank hi International Cricket Council-ah chairman-a ruat a nih avangin May 12 khan BCCI president a nihna chu a bansan ve leh a, Thakur hian a hmunruak hi a luah dawn ta a ni.

Lok Sabha-a MP ni bawk Thakur chuan, "Thla 15 liam ta chhung khan nasa takin kan inthlak danglam a, pawl chak zawk kan nih theih nan hma kan la zel ang. BCCI hnathawhna kawngah langtlang tak leh rin tlak takin hna kan thawk zel dawn a ni," a ti.

BCCI president ni tawh zinga la naupang ber kum 41-a upa Tha-kur chuan sawi chhun-zawmin, "Tumah ṭha fam-kim an awm lo a, mah se buaina a awm a nih chuan siam ṭha turin ṭan kan la nghal zel ang. Ram khat infiamna lar ber hruaitu kan nihna anga kan tihtur chu kan ti zel dawn a ni," tiin BCCI chu rintlak zawk a nih theihna tura hmalak an tum thu a sawi.