Rio-ah India hmeichhe boxer tan hmun a awm lo

24th May, 2016

India-in Olympic medal lak a beiseina pakhat hmeichhe boxing-ah beisei angin thil a kaltluang lo a, Indian hmeichhe boxer zingah Rio Olympic-a inlan phak an awm dawn lo.

Pathianni khan Astana, Kazakhstan-ah AIBA World Championships second round khelh niin Pooja Rani (75kg) chu 2012 world champion Savannah Marshall lakah 3-0 in a chak lo, world champion vawi nga lo ni tawh MC Mary Kom (51kg) leh L Sarita Devi (60kg) te chu second round-ah tho an lo chak loh tawh bawk avangin India beiseina a tawp zui nghal.

London Olympic-ah khan a vawi khat nan hmeichhe boxing telh a ni a, Manipur boxer Mary Kom chuan India tan bronze medal a dawng nghe nghe.