Venghlun hnehin Electric Veng champion

HPC Cup 2016 chu nimin khan Ṭhuamluaia Mualah final khelh a ni a, Electric Veng chuan Ramsangliana goal khat hmangin Venghlun 1-0 a hnehin an champion.

Nimina final khelhah first half-ah goal a lut lo a, goal awmchhun hi minute 51-naa Ramsangliana khung a ni. Venghlun lam hian an siphurh sut tumin nawr let fo mah se Electric Veng captain H. Lalhlimpuia leh a hote tlarhnungah an ding khawng tlat a, goal an chhuah lo.

Lunglei DFA buatsaih HPC Cup-ah hian Electric Veng hi tun hnaiah an chungnung hle a, a zawna vawi thum champion thei hmasa ber record thar an siam. 6th HPC Cup-ah hian goal 17 khungtu Electric Veng striker K. Lalchhanhima chu top scorer niin final-ah hian H. Lalhlimpuia chu man of the match a ni.

Nikum khan team pahnihte hi quarterfinal-ah an lo intum tawh bawk a, Electric Vengin hnehna an chang. Kuminah Venghlun hian an tawn san ber ṭum tawng mah se an player ṭha pahnih B. Rohmingthanga leh Lalliansanga te chu AIFF Alite Academy-a an chhuk tawh avangin an chhawr theih lo a, player langsar pahnih tel loin an hneh lo ngai lakah an tlawm nawn.

Mahse, Venghlun tan lung-ngaih lutuk tur a ni lo ang, an keeper Eddie Zorammawia chu best player atan thlan a ni. Aizawl FC Academy chhuak Eddie-a hian last 16, quarterfinal leh semifinal-ah te a team hi penalty shootout hmangin hnehna a chanpui vek.

Electric Veng hian league round-ah Zobawk North, Ram-thar leh Zotuitlang te hneh vekin pre-quarter final-ah Ṭawi-pui North-I chu 14-2 a sawpin harsatna an tawk lo va, quarterfinal-ah team ṭha leh khawng tak Luangmual chu 3-1 in an hneh bawk. Semifinal-ah erawh an chak awlsam bik lo a, Zobawk South nen hun pangngaiah 3-3 a an inhnehtawk hnuin penalty shootout-ah an tlang hram.