Chelsea-ah Hiddink a cham dawn

Premier League club Chelsea chuan sea-son thar aṭangin manager Antonio Conte kaihhruaina hnuaiah khel dawn mah se manager lailawk Guus Hiddink chu Stamford Bridge-ah a cham chhunzawm zel dawn a, Dutch manager hna tur erawh advisory board lamah a ni thung ang.

December 2015-a Jose Mourinho hmun ruak luah tura Chelsea pantu Hiddink chuan, "Technical advisor han tih em chu a lian lutuk mai thei a, mah se ka hna tur erawh advisory role a ni ang. Chelsea chhuahsantu legend-te kha koh let leh ka duh a, Didier Drogba leh Petr Cech-te chu ka be tawh a ni," a ti.

Hiddink chuan sawi chhunzawmin, "Chelsea hi club upa tak ni mah se club lian an nih ṭanna erawh kum 15 liam ta vel mai aṭang chauh khan a ni a, heng club legend chhuak ta te hian he club tana ṭha tur hi an duh tih ka hriat avangin inkhelh an chawlhsan hunah Chelsea-a lo kir leh turin ka sawm a ni," tiin Chelsea player hluite nen London club hmasawnna tura thawh ho a chak thu a sawi.

Football khawvela tawnhriat ngah tawh tak Dutch coach chuan, "Ṭhenkhat chuan assistant manager nih an duh ang a, a ṭhenin scouting lama awm an duh ang," tiin Chelsea player hluite chu a ṭangkai thei ang bera hman a tum thu a sawi bawk.