PVL 2024 Final : Hunthar hmachhawn tur Tuichangral inpeih

Ather Pro Volleyball League 2024 chu zanin dar 8:00 hian a hmawr bawk a ni dawn - mipa champion nih tumin Hunthar leh Tuichangral an inhmachhawn dawn, tun season inelna hmang ṭha pahnih an intawng dawn tihna a ni.

Tualchhung volleyball inelna lian leh sang ber hi LPS Arena, Falkland Vengah khelh a ni dawn. Mizoram Volleyball Association (MVA) secretary C. Lalrokhuma chuan inkhel en turte chu kal hma turin a chah a; TV leh YouTube lamah en theih a ni bawk ang.

Lungthu kim tum

Hunthar hi volleyball ngaina veng an ni a, anmahni player chher chhuah pawh an ngah ṭhin - tun ṭumah pawh hian an veng mi player panga an nei a, coaching staff pawh veng mi leh sa vek an ni; zaninah veng mipui an tam dawn tih a sawi lawk ngam.

Pro Volleyball League-ah hian kum 2017 leh 2018 khan nomawi an chawi tawh, season hmasa khan final lut mah se a vanduai zawkah an ṭang thung; kuminah hian a lungthu kim nan champion ngei an tum a, thapui an thawh dawn a ni.

Hunthar coach VL Malsawma Renthlei chuan, "Player mal anga kan thlir a nih chuan Tuichangral hian an nei ṭha ber ang, fimkhur tak chunga kan hmachhawn a ngai dawn a ni. Chutihrualin ka naute pawhin tawnhriat an nei ṭha tawk ve bawk.

"Team ṭha hmachhawn tur ni mah ila champion kan duh chuan chak kan tum ngam a ngai," tiin Vanglaini a hrilh. Tualchhung player an neih ṭhat bakah Anurag Rawat (6ft 5in) an nei a, ani hi Tuichangral tan a hnawksak leh khawp ang.

Tun season PVL-ah Hunthar hian match ruk an khel tawh a, an chak fai vek. Season hmasa final-a an ngam loh Thutak Nunpuitu Team (TNT) hneh chungin bul an ṭan a, zanina an khingpui tur ngei pawh hi 3-0 a an hneh tawh a nih avangin inrintawkna an nei sang dawn.

Tuichangral inpeih

Khaw chhak tlangdung team, volleyball ngaina khua hrang hrang awmkhawm an ni bawk a, Tuichangral hi an thawm a na thei hle. Coach David Fanai chuan, "Game a nia, a sawi lawk theih loh, league round lama kan hneh loh ni mah se hneh let kan tum.

"Semifinal kan luh khan camp kan nei zui a, chu chuan nasa takin min thuam chak. Kan boruak a ṭhain ka naute pawh an tha a za hle," tiin Vanglaini a hrilh a, volleyball inelna liana champion turin Hunthar an hneh theih ngei a beisei.

Tuichangral hian league round lama an hneh loh TNT chu semifinal-ah an hneh let thei a, zanin atan pawh inrintawkna an neih san phah. Hunthar hneh let tur erawh chuan Sonu Jakhar bakah Lalbiakmuana leh a ṭhiante an chetṭhat a ngai dawn.

Tualchhung player an nei ṭha a, an tha tichak zual turin Sonu Jakhar an nei bawk. Sonu hi kum 18 mi chauh la ni mah se Haryana tan Khelo India Games-ah gold medal a hlawh chhuak tawh, counter attacker hlauhawm a nihna hi Hunthar tan pawh a tawh a khirh hle ang.

David-a chuan a naute chu an ṭhat dan taka an khelh chhuah theih a beisei thu a sawi a, an khingpui lamin point neih tuma an hlap lo dansak tur leh point nei tura ball hlap thla turin an inringtawk tih a sawi a ni.