ECL: Thawnthu thar ziaktu Olympiacos an champion

Europa Conference League final chu Nilaini zan khan khelh a ni a, Greek club zinga European football champion hmasa ber ni turin Olympiacos chuan nomawi an chawi - final-ah hian Fiorentina chu 1-0 in an hneh.

Greek club tan Ayoub El Kaabi chuan inkhela goal awmchhun hi a khung a, goal a khung hian minute 116-na a ni tawh a, Italian club tan 'comeback' turin hun a tam tawk tawh lo - Olympiacos an champion.

Fiorentina tan erawh a na vawng vawng ang - season hmasa khan ECL final hi an lo lut tawh bawk a, mahse, West Ham hneh loin champion nomawi an chawi lo. Tun season-ah champion beiseina sang tak nen inlan mah se, a vanduai zawkah bawk an ṭang leh ta.

Inkhel hmuhnawm

Team pahnihin champion an tum ve ve a, inkhel ṭantir aṭangin innawr nghal mah se, chance mumal sawi tur erawh a tam bik lo. Greek club tan Wolverhampton Wanderers aṭanga loan-a an hawh Daniel Podence chuan minute thumna lekah chance duhawm a nei a, mahse, Fiorentina goalkeeper Pietro Terracciano chuan ṭha zetin a dansak.

Fiorentina tan midfielder Giacomo Bonaventura pawhin chance duhawm a nei ve bawk a, mahse, Greek keeper Konstantinos Tzolakis chuan harsatna nei loin a lo dang - Italian club tan Dodo-a'n ṭha taka ball a lakluh hnuah Christian Kouame tan siamsak mah se, engmah lo maiah an chantir.

Team pahnihin goal khung an harsat avangin extra time khelh a ngai zui a, a tawpah Olympiacos an vannei ta zawk - minute 116-naah El Kaabi chuan Santiago Hezze siamsak chu goal-ah a chantir a, 1-0 in Greek club an chak.

Hei le El Kaabi

Olympiacos-in ECL nomawi an chawi theih nana player pawimawh ber thlang chhuak dawn ta ila, El Kaabi thlan ngei a ngai ang - Morocco international hian ECL match kua a khelhah goal 11 a khung a, assist vawi khat a nei.

Greek club hian semifinal-ah rin hlawh zawk Aston Villa an hmachhawn a, El Kaabi hian goal nga a khung. First leg-ah hattrick a siam a, second leg-ah goal hnih a khung bawk - Premier League club-in an ngam lo hle.

Morocco, Chinese Super League, Turkish Super Lig leh Qatar Stars League-ah te pawh lo khel tawh El Kaabi hian tun season inelna hrang hrangah match 50 a khel a, goal 33 khungin, assist vawi thum a nei.

Fak tlak Mendilibar

Olympiacos coach Mendilibar-a'n season hmasa lawk khan Europa League-ah Sevilla a champion pui a, mahse, tun season-a an league match hmasa pariatah vawi hnih chiah a chakpui avangin an ban - February 12 khan Olympiacos hi a zawm ve chauh!

Super League Greece-ah pathumna nihpui mah se, ECL-ah erawh final luhpuiin, nomawi hial a chawipui ta - Greek football-ah hriatreng a ni tawh ang. Mendilibar chuan, "He club-in a la tawn ngai loh kan tawn ho avang hian ka lawm takzet. Hlim takin he champion hi kan lawm ang a, kan hmaa inchhawpte hmachhawn turin kan inbuatsaih zui leh ang," a ti.

Greece prime minister Kyriakos Mitsotakis pawhin an ram club hi lawmpuiin, "Olympiacos chu ECL champion niin, bung thar an kai ta. An club tana zan hlimawm tak a nih rualin, Greek football tan pawh thil lawmawm a ni," a ti. Panathinaikos chuan kum 1971 khan European Cup final lutin, Ajax an ngam lo a, Olympiacos hi anni tih loha European football-a final lut awmchhun an ni a, champion awmchhun an ni zui.

Zan lungchhiatthlak

Greek football tan zan chhinchhiahtlak a nih laiin Fiorentina tan erawh zan lungchhiatthlak a ni thung - a zawnin ECL final an lut a, an chak lo ve ve a, season hmasa khan Coppa Italia final-ah an tlawm bawk.

Italian club hi kum hnih chhungin final pathum an khel a, an tlawm vek tihna a ni - kum 2001 hnuah nomawi an la chawi leh lo. Fiorentina boss Vincenzo Italiano chuan, "Tun ṭum chu nomawi chawi ngei kan inring lehzual a, chuvang chuan a na takzet.

"A vawi hnih nan kan tlawm leh ta. Ka player-ten an theihna zawng zawng an hlan vek chungin goal kan khung thei tlat lo! Ka player-te ṭap lai hmuh kha hrehawm ka ti a, tun ṭum chu ṭha zawka a tawp khar kan inbeisei tehlul nen," a ti a, a khawngaihthlak hle.