Barcelona coach thar Flick

Xavi an ban hnuah Barcelona chuan coach atana Hansi Flick an lakluh thu an puang ta a, Bayern Munich boss hlui hian Nou Camp-ah kum hnih hun hmang turin contract a ziak.

Barcelona chuan Flick an lakluh thu hi puangin, "A team-te high pressing game a khelhtir avanga hriat hlawh, game hmuhnawm tak a phochhuah hmanga nomawi chawi theih ang zawng zawng deuhthaw chawitu chu kan club coach ni turin kan ruai ta," an ti a, an phur hle.

Flick chuan, "Ka tan chawimawina ropui tak a ni a, he hmuna contract ziah hi ka duhthusam a ni. Bayern Munich ka awm laiin nomawi ka chawi nual a, nomawi chawi leh tur hian ka tuihal takzet a ni.

"Barcelona nen nomawi chawi tura kawng kan zawh ho ka beisei a, hlawhtlinna tam tak kan chhar ho theih ka beisei - chu chu a pawimawh em em a ni," a ti a, Catalan club-ah hlawhtlin theih a inbeisei hle.

Kum 59 mi Flick hian 2019-20 season-ah khan Bayern chu treble champion nihpuiin, DFL-Supercup, UEFA Super Cup leh FIFA Club World Cup-ah a champion pui bawk a, 2020-21 season khan league nomawi a chawi nawn.

Flick chuan, "Barcelona kalphung leh ka duhdan hi a inmil hle. Ball chan tam a, attacking football khelh nuam ka ti a, chutiang tho chu an ni. Thil dang tam takah pawh kan inrem hle," a ti a, a phur.

Mahse, Flick hi Barcelona-in an ban tak, club legend Xavi chuan a lo sawi ṭhaih tawh a, Spanish coach hian, "Min thlaktu chuan hrehawm tam tak a tawrh ve a ngai dawn a ni," tiin Barca enkawl a awlsam lohzia a sawi.

Flick hi Bayern-ah hlawhtling viau mah se, German club a enkawl hnuah Germany ram team enkawlin, beisei ang result a nei zui lo a, World Cup 2022-ah khan group stage aṭangin a tlakpui.

September 10, 2023 khan ban a ni a, ban a nih hmaa a match hnuhnung berah Japan chu friendly match-ah 4-1 in an ngam lo - Germany coach zinga ban tawk hmasa ber a ni.

Xavi hnuaiah Barca hian season hmasa khan La Liga leh Spanish Super Cup nomawi an chawi a, tun season-ah erawh an nil. Xavi-a'n a enkawl tirh hian league-ah pakuana an ni a, hna a thawk chhe lo - Flick tan a contract hmang zo turin result neih ṭhat viau a ṭul ang.