Bayern innghahna tur Burnley tlakpuitu Kompany

Bayern Munich-in kum 11 chhung Bundesliga nomawi an chawi zawn hnuah Bayer Leverkusen lakah nomawi an chân a, an tluchhia tih tur chu ni lo mah se ropuina rama kir leh turin an kawng zawh tur a thui ta hle.

Europe club lian ber zinga mi Bavarians hi team enkawl châkawm ni ṭhin mah se tun ṭumah erawh an hnawng. Bayern enkawl tura Xabi Alonso, Julian Nagelsmann, Ralf Rangnick, Hansi Flick, Oliver Glasner, Zinedine Zidane leh Roberto De Zerbi te hming a rik hnuah, a tawpa an thlem thluk chu Premier League aṭanga Burnley tlakpuitu Vincent Kompany a ni.

Bavarians hian season liam taa Clarets chet dan an en kân tih a chiang a, Belgian manager Kompany hian Thomas Tuchel a hmun ruak a rawn luah ang. Kum 38 mi Kompany hian kum thum daih contract a ziak a, Allianz Arena-ah June 30, 2027 thleng a cham dawn. Pep Guardiola hnuaia Manchester City captain ṭhin Kompany hi season thara football khawvel mit fukna tur a thei ang.

Kompany hi neitu nei lai a nih miau avangin Bayern-in Clarets hi zângnadawm nan pound maktaduai 10.2 vel an pe nia hriat a ni. Bayern tan season khat nomawi chawi loh hi mualphona a ni a, season hnih a zawna nomawi chawi loh chu chhiatna rapthlak tiin a sawi theih hial ang. Hei vang hian Kompany mawhphurhna a sang dawn.

Talent ṭha bik

Vincent Kompany hi player a nih lai pawha theihna nei sang a ni a, Belgian club ṭha Anderlecht aṭanga inzir chhuak niin Sir Alex Ferguson pawhin Manchester United tana khel turin a lo enthla tawh. Chutihrualin a nuin zirna a ngaih pawimawh avangin a zir tur ang a zawh hma chu an ram chhuahsan a phal lo.

Anderlecht tana season thum a khelh hnuah Hamburger-in an lei chhuak a, German club-in an leina man hi euro maktaduai 10 niin a hun laia kum 20 bawr vel defender manah chuan a tam tham hle. Inhliam vang leh ram tana Olympic khelh a thlan avangin Hamburger tan a khel tam tawk lo a, season hnih hnu lekah Manchester City a zawm.

Club nena an inhmuh thiam loh miau avangin Kompany man hi pound maktaduai 7.6 vel lek a ni a, a hlawkna teltu chu English club an ni. Man City hian Kompany aṭangin team thar an din a, Pep Guardiola-a'n thuneihna a rawn chan hnuah pawh hmun pawimawh a chang zel.

Kompany hian Man City hi Premier League nomawi pali, FA Cup pahnih leh League Cup pali a chawipui a, club legend-a chhiar niin Etihad Stadium pawnah a lim an dah hial. Belgian defender hi a inzir chhuahna club Anderlecht-ah player-manager turin a kir.

Mahse, Kompany hnuaiah Anderlecht-in bul an ṭan chhiat avangin manager nihna a kalsan a, captain hna chauh a chelh ta zawk. Football khelh a chawlhsan hnuah Anderlecht-ah manager hna a chelh leh ta tho.

Manager Kompany

Man City defender rinrawl tia khawvelin a hriat Kompany chuan kum 2020 aṭangin hun pumin manager hna a chelh ṭan a, player nen a nih kawp lai aiin hma a sawn hret. Belgian Cup-ah final a thlenpui a, nomawi chawi lo mah se a naute a khelhtir dan hmang avangin fak a hlawh thung.

Championship club Burnley-in Kompany hi an la lut a, hming a chher hle. Match 46 aṭangin 101 points an hmu a, Championship-ah Leicester City-in 2013-14 season-a 100 points an hmuh kai hnua hmu kai leh thei hmasa ber an ni.

Manager anga Kompany hlawhtlinna hi season khat chauh a ni a, season hman zawh takah khan Premier League-ah point 24 hmuin an relegate. Clarets hian goal 41 khungin goal 78 an chhuah a, heti chunga Bayern-in Kompany an la lut hi thilmak a tling.

Hna chân huamin!

Thuthang awm dan chuan Bayern-a hotu lian ni ṭhin Karl-Heinz Rummenigge leh Uli Hoeness ten club enkawl turin hlawhtlinna ṭhahnem tak chang tawhtu Hansi Flick an duh. Flick hian Bayern a hrechiang a, a thlawnin a lak theih bawk.

Flick pawhin Bayern enkawl hi duh mah se Bayern board member for sport Max Eberl-a'n a biak loh avangin a lungawi lo a, Barcelona-in Xavi thlakna an duh bawk nen Catalan club nena inremna siam a thlang a zawk.

Bayern-in Kompany an thlan chhan chu Eberl leh sporting director Christoph Freund thutluknaah a ngaih theih. Kompany hi a hlawhtling lo a nih chuan Bayern hotu pahnih hian an hna an chân phah thei hial ang. Bavarians hian tun hnaiah CEO Oliver Kahn leh sporting director Hasan Salihamidzic te chu Julian Nagelsmann bana Thomas Tuchel an lakluh vangin an ban tawh a, hetiang hi thleng nawn thei a ni.

Pep-a hnuaia inzir

Tun dinmuna khawvel manager ṭha bera chhal theih chu Manchester City manager Pep Guardiola a ni a, Spanish manager hian City a hlawhtlinpui mai a ni lo - a hnuaia awm tawhte an inchuh nasa ṭhin hle. Pep-a hnuaia assistant coach hna chelh tawhtu Mikel Arteta-a'n Arsenal-ah hlawhtlinna a chang chho mek.

Chelsea manager thar Enzo Maresca pawh Pep-a hnuaia thawk tawh tho a ni a, hei vang hian Pep-a nena sawizawm theih manager-te hlutna a sang a tih theih. Bayern Munich pawhin an manager hlui Pep hi an dahsang a, Kompany an lakluh chhanah Pep-a hi a inrawlh a ngaih a ni.

Bayern hian Pep-a thurawn an la a, German club-in manager ni thei turah Kompany hming an lam ri a, Spanish manager hian phur takin a sawipui niin an sawi. Belgian manager hian khelh dan hmang nghet a neih miau avangin Bayern-in an la hi a mak lo. Burnley meuh pawh counter attack khel ṭhin aṭangin high pressing game khel ṭhinah a chhuah tlat.

Social media-ah pawh Kompany-a'n dressing room-a Anderlecht player-te a fuih lai a darh nasa a, Belgian manager hi thu duh ve tak a ni tih a lang. Bayern Munich-in England captain Harry Kane bakah Bayern neitu ti hiala sawi theih German trio Manuel Neuer, Thomas Muller leh Joshua Kimmich te an kawl dawn a, manager thar Kompany nena dressing room-a an inhmachhawn chu hmuhnawm a tling ang. Kimmich hian Germany-ah Hansi Flick-a game plan dik tawk lo lai a chhuahchhal ngam tih hriat a ṭha.

Nula chhelo an chhuah

Bayern-in eng ang chiahin nge Kompany an ngaihhlut tih hriatthiam a la har a, Burnley erawhin an ui hle. Clarets chairman Alan Pace chuan Kompany khelh dan hi a ngaina nghal a, Championship-a point 101 hmua season khatnaa an champion khan mawi zetin an manager hi a fak.

Pace chuan, "Khaw khat nula chhelo ber nena inngaihzawn ang a ni," tiin Kompany nena thawhdun nuam a tih thu a sawi a, tunah erawh chuan Burnley-in an khaw nula chhe lo ber an chân ta.

Tunah erawh Kompany-a'n Burnley-a a chet chhiat lai pawha thlawp tlattu club thuneitute phatsanin team ṭha leh ropui zawk Bayern sawmna a thlang. Clarets hi Chelsea leh Everton manager hlui Frank Lampard nen sawizawm an ni a, player angin Lampard-a zun a uai na viau mah se manager nih hnuah erawh khaw khat nula pangngai ve mai a ni.