Silly Point : USA leh Cricket
Kum zabi 20-naa khawvela ram ropui bera chhal chu United States of America a ni a, music leh film lam industry-ah pawh America rama an lar tak tak loh hi chuan, ramtiam thlengah artist-te hian an inngai thei lo. The Beatles ho khawvel hrutchhuahna chhan bulpui ber pawh, America ram mipuite thinlung an luhchilh vang kha a ni tlat.
Cricket bul ṭanna US
Kan hriat ṭheuh angin America ram luah hmasa ber tute chu Native American kan tih (Red Indian) te an ni a. Kum Zabi 15-naah Christopher Columbus-a'n America ram a zuk luhchhuah hnuah, Europe vun ngote chu an pem thla ta zel a, chuta a lutthla tam ber pawh cricket hmuchhuaktu British mi ngo ta an ni. Kum zabi 18-na a lo inherchhuah meuh chuan US leh Canada chu European mi ngo ho ram a lo ni ta.
ICC record-a khawvela International Cricket hmasa ber 1882 a Australia leh England in an khelh hma kum 38 daih tawh khan, khawvela international sports hmasa ber chu cricket hmangin US leh Canada chuan September 24, 1844 khan New York khawpuiah ni hnih awh Test match an lo khel tawh a ni.
An intumna tualzawl lah hi tun hnua khawvela khawpui lar ber mai New York laili tak, New York ti New York tu an tih Manhattan junction of First Avenue leh East 31st Street lai tak khu a ni nghe nghe.
Record lama a lan danah chuan mipui sang nga velin inkhel ṭan ni hian an thlir nghe nghe a, tin he inkhel a inchawina (betting) pawisa leng vel chu $1,00,000 lai niin, vawiin ni angah chuan India pawisain cheng vaibelchhe 35 hu ang vel a ni. Politician leh USA dintu hmasa zinga mi William Bird III-a 1704 diary-ah, cricket game hi USA a infiamna lar ber a nih thu a thailang nghe nghe.
A chuai thut
Baseball game nen lar ber nih a inchuh chho zak zak reng a. America president George Washington-a pawh kha kartawpa cricket khelh ching tak a lo ni awm e. Warwick University a Social Historian, Prof Tim Lockley-a'n the Guardian chanchinbu a hrilh dan phei chuan, “Khang hunlai khan America ramah hian Cricket hi infiamna lar ber a ni a. A ne han ek pha hi an awm meuh lo. Mahse, 1861 a America Tualchhung Indona lo chhuak ta tuar ber zingah he cricket game hi a tel a ni," tiin a sawi.
Hun lo kal zelah, America ram chu Kumpuinu hnen aṭangin a lo indang chho a, Cricket game lah a chawr chhuahna Kumpinu ram leh a awpte (imperial colony) lamah an intibik ta deuh. America lam chuan hnuchhawn nih a hlawh a, Australia, South Africa leh Indian Sub Continent lamah an in sawrbing ta. US-ah chuan a lo thi zui titih ta a lo ni. Hei bak hi chu Dwight Eisenhower-a president hunlaia Karachi-a Pakistan khual ṭha a nih anga a en leh kum liam ta maia Ahmedabad-a Donald Trump-a'n Sachin Tendulkar leh Virat Kohli a te hming lam dik hlei thei loa a lamchhuah hram kha a ni zui ta mai awm e.
US muang changin a harh
Mizoram buai hma 1965 khan ICC-in US chu Associate member-ah a pawm ve ta a. Mahse US nena thil inmil lo deuh chu, US cricket Asst history hi management fuh lo leh eirukna leh innghirhona hlira a khat tlat hi a ni a. Hei hi US Cricket ṭhanmawh bawk bulpui ber a ni.
Zir mite chuan, henga US a cricket rawn tharh thawh leh tute hi Indian Sub Continent Asian ho (Mizoten vai kan tih mai hi an ni a) an ni a, hma pawh a sawn chak thei lo an ti hial a ni. Vai ho hian hnam dang ai hian rinawmna te hi an lo tlachhamin, mahni hmasialna leh duhamna te hi an thisenah a lo bet zawk tawh ni ngei tur a ni. Mizoram cricket ṭhang chho zel tur pawh hi a fimkhur deuh deuh a ngai awm e.
US leh vawiin cricket
ICC chuan a ṭum khatna atan, sum lama Rangkachak Artui tui chhuah saktu T20 World Cup chu a ṭhenawm West Indies te thlazar hnuaiah USA-ah an nghat ve dawn a ni a. Ni e, mi sing 3/4 lenna, stadium phuahchawp (infiamna dang ho khelmual) hawh chungin US lam chuan inkhawmpui an han thleng ve dawn chu ni a.
NBA leh NFL chu sawi loh, MSL te anga New York khawpui emaw, USA a cricket tan liau liauva Stadium awmchhun pahnih Dallas leh Florida ram a mite pawh (cricket khelh aiin, concert nan vela la lar zawk mah nise) ah hian, traffic han ti jam leh nunphung han ti khaiklak tur chu a ni miah lo ang. Mahse khawvel hmun tinah mai hian vai kan tih mai ho hi an lo inekchhe beng ve thei zel a, cricket chu USA-ah na na na chuan a khua hi a har bik lo ang tih erawh a sawi theih.
Engpawhnise, cricket-in America khawmualpui a la tur chuan kan dam hun chhung chuan beisei lo ila. Mahse, cricket khawvelin bung thar erawh a kai kan ti thei ang.