December-ah Usyk vs Fury a thleng leh dawn

Heavyweight boxer rothap pahnih Oleksandr Usyk leh Tyson Fury te chu December 21-ah a vawi hnih nan an inhmachhawn leh dawn a, Saudi Arabia-ah bawk boxer pahnih hi an inhnek dawn.

Usyk leh Fury intawn leh tur thu puangtu pawh hi Saudi Arabia general entertainment authority chairman Turki Alalshikh a ni a, Alalshikh chuan, "Khawvel chuan fight hriat reng tlak a hmu leh dawn a ni," a ti.

Boxer pahnih hi May 18 zan, keini lam sanaa May 19 zing khan a vawi khat nan an inhmachhawn a, WBA, WBO leh IBF kawnghren kawltu Usyk chuan Fury hnehin, WBC title a hlawh belh a, four-belt era-a undisputed heavyweight champion hmasa ber a ni.

A vawi khatna

Boxer pahnih intawn hmasakah Usyk-a'n split decision hmangin hnehna a chang a, hei hian fighter pahnih inbeihtawkzia a tarlang. Boxer pahnih hian rematch neih theih turin contract an ziak sa a, "An inhnek leh dawn em?" tih ai chuan, "Engtikah nge?" tihna chu zawhna zawk a ni.

Boxer pahnih hi a tirah chuan October-a inhnek leh mai tura ngaih an ni a, mahse, hun a kal hret a, December-a inhnek nawn tura tih an ni ta zawk.

Alalshikh chuan, "Boxing fan-te kan ngaihsakna chu kan tilang zel a, hmuhnawm ti taka inen ngei kan beisei," a ti a, boxing fan-te tan inhnek hmuhnawm tak phochhuah zel an tum tur thu a sawi. Boxer pahnih hi Saudi-ah an inhnek leh ngei dawn a, an inhnekna tur stadium erawh puan a la ni lo.

Belt pali?

Kum 1999 khan Lennox Lewis chu undisputed heavyweight champion a ni a, mahse, a hnuah erawh an awm lawk thei lo. Tunah Usyk-a'n he record ropui hi a rawn ṭawm ve ta a, ani phei chu kawnghren langsar pali awm hnuah niin, a record a ropui lehzual.

Mahse, fight vawi 22 a hmachhawn tawha la chak vek Usyk hian Fury nen an intawn hmasak angin a belt a thap vek thei lo mai thei. IBF lam chuan Usyk hi an pawl kalphung anga 'mandatory challenger' hmachhawn turin an duh a, mahse, Fury a hmachhawn a ṭul si - hei vang hian IBF kawnghren hi an hlihsak mai thei.

Kum 37 mi Usyk erawhin IBF hnenah hian a buaina chu hriatthiamsak turin a ngen a, IBF board of director-ten an ngaihtuah ve leh ang - a professional career-a a vawi khat nana tlawm Fury chuan kawnghren zawng zawng inchhawp leh a duh dawn.