Third round-ah Alcaraz a lut

Carlos Alcaraz chuan Jesper de Jong hnehin French Open third round a lut, clay court inelna lian leh sang berah hian a zawna a vawi li nan second round a paltlang a ni.

Nilaini zan khan Court Philippe Chatrier-ah Alcaraz hi a inlan a, world number 3 hi awlsam taka chak chu a ni mai bik lo - Dutch tlangval De Jong hian a vawi li nan Grand Slam main draw a khel chauh a ni a, set khat chauh lak pawh a tan a hlu.

Spanish tlangval Alcaraz chuan, "Theih ni se la chuan court chhungah hian a rei lo thei ang ber hun hman ka duh. Jesper kha a khel ṭha em em a, mahni duh anga kal ngawt theih kha a ni lo.

"Duhthusam angin khel thei vek lo mah ila ka tan chuan zirlai ṭha tak a ni, a bik takin set thumna ka khelh ang kha chu thleng nawn tawh lo se ka duh," a ti, a match lehpekah chuan Sebastian Korda leh Kwon Soon-woo inkhela chak zawk a hmachhawn leh ang.

Inkhel dangah champion tum ngam zinga mi Jannik Sinner, Stefanos Tsitsipas leh Andrey Rublev te pawhin an khingpui ṭheuh hnehin round sang zawk an inhlangkai ve bawk a ni, anni hi an chesual viau a nih loh chuan an thlen san a rinawm.

Seeded pakuana Tsitsipas chuan Daniel Altmaier chu 6-3, 6-2, 6-7 (2-7), 6-4 in a hneh a, Greek tlangval hian a vawi khat nan Grand Slam title lak ngei a tum; kum 2021 khan French Open bikah pawh hian final a lo lut tawh a ni.

Court Suzanne Lenglen-ah Russian tlangval Rublev a inlan a, a khingpui Pedro Martinez chu 6-3, 6-4, 6-3 in a hneh. Court Phillipe Chatrier lamah Australian Open champion Sinner chuan Richard Gasquet chu 6-4, 6-2, 6-4 in a hneh ve bawk.