Osaka hnehtu Swiatek

French Open hmeichhe champion lai Iga Swiatek chuan a nomawi humhim turin kawng dik a zawh zel. Polish nula hian a khingpui Naomi Osaka-i'n match point a hmuh tawh chu pawtthla lehin third round a lut.

Kum 22 mi Swiatek hian a zawna a vawi thum nan champion a tum a, a hna erawh a hautak hle. Darkar hnih leh minute 57 an inkhelh hnuah 7-6(1), 1-6, 7-5 in a chak zawkah a ṭang hram.

Roland Garros match 16 chhung chak tawh Swiatek chuan, "Second round chauh a la ni a, kum dang ang chu ni se inkhel hautak lutuk lo deuh pawha tlang theih hun ang kha a la ni.

"Mahse, ka khingpui kha Naomi a ni miau a, inkhel a hautakin a awlsam lo hle a ni," a ti. Serena Williams awm loh hnuah chuan Swiatek hi hmeichhe tennis thunun thei ber a ni mek a, a la ni chhunzawm zel dawn ni pawhin a lang.

Chak lo zawk Osaka tan pawh lawmna tur a awm. Japanese star hi fa a neih hnuah tennis khel leh a ni a, a vanglai anga khelh chhuah leh nghal harsa mah se Grand Slam huangah ṭha takin a khel thei leh ta tih a takin a lantir a ni.

Grand Slam vawi li champion tawh Osaka chuan, "Chak lo chungin tennis court ka chhuahsan a ngaih avang khan ka mittui a tla. Mahse, season hmasa kha chuan he hmunah hian raipuar chungin Iga-i inkhel lai kha ka en tih ka hria.

"Winners vawi 17 zetin ka vaw chhuak tam zawk a, a service pawh vawi nga ka chhuhsak laiin ṭum thum chauh min chhuhsak. Chak lo zawk ni mah ila ka inkhelh danah khan lawmna tur tam tak a awm a ni," a ti.

Osaka hi clay leh grass court-a inkhel thiam tak a ni lo a, a vanglai pawhin French Open leh Wimbledon chu result ṭha neih a harsatna hmun a ni. Tun anga hma a sawn zel chuan season tawp lama khelh tur US Open-ah meuh chuan hmachhawn a hautak tawh khawp ang.