Kroos leh Reus duhsaktu Fullkrug

Borussia Dortmund striker Niclas Fullkrug chuan Toni Kroos leh Marco Reus ten an champion nomawi an phu ve ve thu a sawi. German club Dortmund hian June 1, Inrinni zan dar 12:30 hian Champions League final-ah Real Madrid an hmachhawn ang. UCL final hi Toni Kroos tan club football a khelh hnuhnun ber tur a ni a, Reus tan Dormtund tana a inlan hnuhnun ber a ni thung ang.

Kum 31 mi Fullkrug chuan, "Kroos leh Reus te hi legend ve ve an ni a, champion pawh an phu. Kroos hian UCL nomawi hi a phu a, a chhan chu football khawvela player ropui ber zinga mi a ni. Mahse, tun ṭum final-ah erawh Reus hian nomawi chawi se ka ti.

"Ka duhthusamah chuan Reus-a'n UCL nomawi a chawi ang a, Kroos-a'n European Championship-ah Germany a champion pui thung ang. Hei hi a thleng a nih chuan nomawi pahnih ka chawi thei dawn," tiin club leh ram tana a khelhpuite a duhsak thu a sawi.

May 29, Nilaini khan Santiago Bernabeu-ah Taylor Swift-i'n concert a nei a, entu zingah Kroos hi a tel. Khelmual chhunga cool taka khel ṭhin Kroos hi June 1, Inrinni zanah chuan Wembley Stadium-ah a entu ni loin mipui thlir rawn a ni tawh thung ang.