Bonucci-a'n a boot a khai

Italy leh Juventus legend Leonardo Bonucci chuan football khelh a chawlhsan thu a puang. Kum 37 mi Bonucci hian Euro 2020-ah Italy a champion pui a, Juventus tan nomawi ṭhahnem tak a chawi bawk.

Italian defender Bonucci hi Italian club ṭha Inter Milan, Juventus leh AC Milan tan a khel a, a hun tawp erawh Turkish club Fenerbahce-ah a hmang. Nikum nipui khan Bonucci hian Juventus aṭangin Union Berlin a pan a, German club hia beisei pha loin January thla khan Fenerbahce-ah an insawn.

Tun hma aṭangin Italian football hi goal venhim kawngah n lar ṭhin a, kum 2005 hnu lamah chuan Italy tan Bonucci, Andrea Barzagli leh Giorgio Chiellini te an langsar. Manager ropui Jose Mourinho phei chuan, "Bonucci leh Chiellini te hian goal venhim dan hi Harvard University-ah an zirtir thei ang," ti hialin a fak tawh a, hei hian an theihna sanzia pholang.

Bonucci hian Juventus tana a khelh lai ringawtin Serie A nomawi pariat leh Coppa Italia nomawi pali a chawi a, Euro 2020-a Italy champion ṭum khan final-ah England lakah siphurh sutna goal pawimawh a khung bawk.