Tleirawl Swiatek kutah French Open nomawi

Hmanni lawk khan chuan, "Tennis ka khel chhunzawm zel ang nge university lamah lehkha ka zir zawk ang aw..." tiin a inngaihtuah buai ve hle a, tunah chuan French Open hmeichhe singles champion a ni ta - Iga Swiatek kutah Roland Garros title hlan a ni.

Inrinni zan nomawi inchuh-na inkhelah kum 19 mi Swiatek hian darkar khat leh minute 24 chhungin Sofia Kenin chu 6-4, 6-1 in a hneh a, world number 54 hi French Open champion thei zinga ranking hniam ber a ni hial.

May thlaa khelh tur kha hri leng vangin September thlaah khelh a ngaih avangin Paris khawpui a vawt tawh a, player tam tak chuan khaw vawt vangin harsatna an tawk. Court Philippe-Chatrier chu thli thawin a chhem a, ni chuan dul raihin court chhunga 'clay' a chhun eng bawk.

Australian Open champion leh seeded pakhatna ni bawk Kenin chu rinkai zawk ni chungin a inlan, tleirawl Swiatek tan erawh thil thar vek a ni thung. Mahse match tir aṭanga a tawp thlengin Poland nula a chungnung.

Swiatek-i ball vuak na tak chu Kenin-i'n a chelh lo, American star hian a khingpui service vawi thum chhuhsak mah se vawi ruk ngawt a hloh thung. Winners vawi 25 vaw chhuak thei Swiatek zawkin a forehand ṭha tak chu a din chanpui a ni.

Wimbledon 2018-ah khan junior huangah Swiatek hi a champion, a hnu lamah erawh ropui takin a khel lem lo. Paris khawpui a pan hma khan senior level-ah nomawi chawi a la nei miah lo, seeded pawh a chang phak lo.

Mahse, 5 ft 9 in a sang player hian beisei phak baka ṭhain inelna a hmachhawn, nomawi chawi tur hian match sarih a khelhah set a hloh miah lo - final kalkawngah hian seeded pakhatna Simona Halep pawh a hneh.

Justine Henin (2007) hnu lamah Swiatek hi set hloh loa champion leh thei hmasa ber a ni a, season thum liam taa Jelena Ostapenko ang bawk khan seeded ni lo chunga title la leh thei hmsa a ni bawk, ranking chhuak tharah 54 aṭangin 17-naah a kaisang ang.

Nomawi a chawi hnuah Swiatek chuan, "Rinkai lo zawkin Grand Slam nomawi ka chawi, hmeichhe tennis huangah player thar tan kawng zau takin a inhawng mek, a nuamin a hlimawm," tiin midang tan pawh hlawhtlin theih a nihzia a sawi.

Grand Slam hnuhnung pariat zinga pasarihah - Naomi Osaka, Sofia Kenin, Ashleigh Barty, Bianca Andreescu leh Swiatek te chu kum 23 hnuai lam mi ni chungin an cham-pion a, player malin inelna an thunun loh bakah kawng a inhawnzia a tilang fiah.

Swiatek-i coach Piotr Sierzputowski chuan a player-in lehkha a la zir avangin zing hma takah tennis an khelh ṭhin thu a sawi a, "Training zawh hnuah school kalin a ṭhian dangte ang bawkin lehkha a zir ngawrh thei hle," tiin a sawi.

Nizan khan champion lai leh record nei ṭha ber ni bawk Rafael Nadal leh world number 1 Novak Djokovic ten mipa singles final an khel a, he thu buatsaih lai hian champion kan hre hman lo.

Spanish star Nadal hi a champion a nih chuan French Open nomawi vawi 13 a lak tlinna tur a ni ang, seeded pakhatna Djokovic erawh Paris khawpuiah hi chuan 2016 chauh khan hlawhtlinna a la chang.

Covid-19 vangin tennis inelna a mumal thei lo a, a hun pangngaiah Australian Open an khelh bak chu beisei angin thil a kal lo. Wimbledon ṭhulh a ni a, US Open chu a hmuna entu awm loin an khel, French Open pawh May thlaa khelh tur kha September aṭangin an khel ṭan chauh.