Lakers chelhtu Butler

LeBron James awmna Los Angeles Lakers chuan Kobe Bryant hriatreng nana NBA title lak an tumna hmasa chu a tlawlh rih, tukin dar 5:00 hian game 6 khelh zui niin Lakers hi an chak a nih chuan an champion tho ang.

Inrinni zing khan Lakers hian series kal laiah 3-1 a hma hruai chungin game 5 an khel, chak tura rinkai pawh an ni. Bryant hriatreng nan 'Black Mamba' chuanna jersey an ha, mahse Miami Heat lakah 111-108 in an chak lo.

Lakers lam hian 21.8 seconds chauh a awm tawh tihin point khatin hma an hruai, mahse foul an neih chu Jimmy Butler-a'n point neih belh nana hmang ṭangkaiin Heat lam hma a hruai pui a, Lakers guard Danny Green-a'n hun ṭha a hloh zui avangin Heat lam an chak.

Heat tan Jimmy Butler-a'n minute 47 chhungin point 35, rebound 12 leh assist vawi 11 a nei hman a, an chakna hnar pawimawh a ni. Lakers thiampuipa James-a'n point 40 zet nei mah se team chak nan a tawk zo rih lo.