Liverpool-in Butland an dawr lo?

Premier League champion Liverpool chuan Stoke City goal-keeper Jack Butland lakluh tumin an hel nia sawi ni mah se 'Liverpool Echo' chanchinbu chuan Reds hian England tana vawi kua inlan tawh goalkeeper hi lakluh an tum loh thu an tarlang ve thung. 

Liverpool keeper chhuanvawr Alisson chu hliam vangin a chawl mek a, Echo lamin an tarlan danin Brazilian goalkeeper ṭha hian Liverpool tan match sarih tal a khelh loh a ngai dawn. 

Alisson tel loa Aston Villa an hmachhawnna inkhelah Liverpool tan second choice goalkeeper Adrian chuan si ban a nghak a, 7-2 ngawta an tlawmna inkhela goal hmasa ber hi Spanish keeper tihsual vanga lut a ni. 

Season hmasaa Alis-son inhliam laiin Adrian hian Premier League-ah ṭha takin hna thawk mah se Champions League leh FA Cup aṭanga petchhuah an nih chhanah mawh puh theih a ni a, fans tam takin a chungah rinna an nghat ngam tawh lo. 

Hetiang boruak karah hian Jurgen Klopp chuan Butland hi lakluh a tum nia sawi a ni a, mahse Premier League aṭanga Stoke an tlak hnua ngai awh leh tawh lo keeper hi Liverpool-in lakluh tuma an dawr loh thu Echo chuan an ziak. 

Klopp hian sawi angin Adrian hi ring zo lo pawh ni se third choice keeper Caoimhín Kelleher a la nei a, kum 21 mi goalkeeper hi player theihna nei sang bik nia sawi a nih avangin Liverpool fan-te chuan a khel lai hmuh an châk khawp ang. 

Liverpool hian kar hmasa lawk khan Bra-zilian club Fluminese aṭangin rawlthar keeper Marcelo Pitaluga an lalut a, mahse Brazil Under-17 international hi senior squad zawm tur erawhin a la nau deuh.