Champions League Final: Ennawm puan zar hawn a ni dawn ta; Milian Real Madrid hmaah rin hlawh lo Borussia Dortmund

Football khawvela inelna ngaihhlut hlawh ni reng tur Champions League final chu zanin dar 12:30 hian khelh a ni dawn ta - stadium ropui Wembley Stadium-ah Borussia Dortmund leh Real Madrid ten champion an inchuh dawn.

Team pahnih budget, stadium, training ground, player leh coach thleng pawhin khaikhin ila, an inthlau hle. Mahse, khawvel infiamnaah beisei loh result min pe a, hringnun mawina min temtir ṭhintu a awm a nih ngai chuan football hi a ni ngei ang.

Champions League ngei pawh hian chutiang ennawm ropui chu min lo chhawpsak fo tawh ṭhin a, kan hmaah beisei loh result a lo chhawp fo tawh ṭhin. Zaninah pawh thawnthu ngaihnawm ziak turin Dortmund an inpeih a, an ropuina belhchhah turin Real an inpeih ve bawk!

Football ngainatu tan mut hma chi a ni lo a, a mu hma ṭhang tan pawh alarm 'set' mai chi a ni - football fan i inti a nih si chuan zanin inkhel hmuhnawm tur hi i en loh kan duh lo e.

Ti chiah ila...

Real-in kil tinah world class player tia chhal theih tur an rem a, coach Carlo Ancelotti lah Champions League-a vawi li ngawt coach ni chunga champion tawh a ni a, player a nih laiin vawi hnih a champion bawk - hmachhawn hi an châkawm hlawl lo.

Mahse, kum 1997-a an champion bak he inelnaa la champion ngai lo Dortmund an zam bik lo a, coach Edin Terzić a zam lo lehzual. Kum 41 mi coach chuan, "Champions League final luh ringawt hi kan tum ber a ni lo a, champion hi kan tum chu a ni," a ti.

Terzic chuan sawi zawmin, "Champions League nomawi tur chuan team ṭha ber ber hneh a ṭul. Tunah chuan football khawvela sulhnu nei ropui ber club, a bik takin he inelnaa ropui em em Real Madrid chuan min lo hmuak e," a ti a, Spanish club lakah hnehna chan ngei a beisei.

Dortmund fan ruhkawl Terzic hian season hmasa khan, uiawm takin league match tawp ber khelh niin Bundesliga nomawi chu a team nen an lo thlauh tawh a, Champions League nomawi thlauh a, an thinlung hliamsaa chi phul belh an duh lo ang.

Kha mah aw...

Player tan an career chhunga Champions League nomawi pakhat chauh chawi pawh thil châkawm a ni ṭhin a, Real player zingah erawh vawi khat aia tam champion an awm nual tawh - Dani Carvajal, Luka Modric leh Toni Kroos te phei chuan nomawi vawi nga ngawt an chawi tawh!

Zaninah Real an chak a, an champion a nih chuan player pathum hi a vawi ruk nan an champion dawn tihna a ni a, he inelnaa vawi ruk champion awmchhun, Madrid legend Paco Gento record an nihrual dawn tihna a ni.

Tun hnaia Real buaina pakhat chu buaina ṭha chi a ni - keeper Thibaut Courtois inhliam hlanin goalkeeper Andriy Lunin a che ṭha takzet a, Courtois a dam ṭhat leh tak avangin tu zawkin nge final-ah goal veng ang, tiin media lam an inrinsiak.

Mahse, Lunin hi tun hnaiah a damlo a, Ukrainian keeper hi a inlan theih a rinawm lo. Chuti a nih chuan Courtois-a'n si ban a nghak dawn tihna a ni a, hliam vangin khelmual lut tam lo mah se, khawvela keeper class ber pawl hi a ngaihtuahawm lo ang.

Kil tinah...

Real-in kil tinah player ṭha an kawl a, La Liga nomawi an chawi tawh bawk avangin an inringtawk sawt ang. Dortmund aṭanga an lakluh Jude Bellingham mawlh hi en bik ngai tur a ni dawn a, La Liga player of the season hian tun season-ah goal 23 leh assist vawi 12 a nei tawh.

Bellingham hi tlarhmaa Rodrygo leh Vinicius Junior inkawp hnung chiahah ding tura beisei a ni a, Brazilian forward pahnih pawh hian goal thawhchhuah nuam an ti - Rodrygo hian goal 17 leh assist vawi kua a nei tawh a, Vinicius hian goal 23 leh assist 11 a nei thung.

Real tan midfield-ah Euro 2024 zawh ruala inkhelh chawlhsan tawh tur Kroos hoin Eduardo Camavinga leh Federico Valverde te an ding thei dawn a, Aurélien Tchouaméni chu hliam vangin a la inlan thei rih lo ang.

Tlarhnungah Carvajal, Antonio Rudiger, Ferland Mendy leh season tawp ruala chhuak tur captain Nacho Fernandez te an inkawp leh dawn a, Dortmund tan nomawi chawi turin tih theih loha ngaih tihtheih a ngai dawn a ni ber.

Rin hlawh lo

Dortmund-in final an luh khan defender pawimawh Mats Hummels chuan ngeiawm takin anmahni zuamtu club-te a tihel a, German defender hian, "Team tam takin min hmachhawn an châk a, vanneihthlak taka mifel tak kan lo nih hlauh avangin, a tam zawkin min hmachhawn theih nan final kan lut ta a ni," a ti!

Champions League round tinah an elpui club-ten Dortmund hi hmachhawn an lo châk a ni deuh mai thei. Mahse, Hummels a sawi angin Dortmund an chak chho zel a, group stage-ah Paris Saint-Germain, AC Milan leh Newcastle United te nen awm hoa group hmahruaitu niin last 16 an lut.

Hemi hnu hian PSV Eindhoven, Atletico Madrid leh PSG te final lut turin an pet chhuak leh a, an zinkawng a namai lo. Dortmund chet ṭhat nan tlarhnungah Hummels leh Nico Schlotterbeck an langsar a, tun season inelna hrang hranga goal 10 leh assist vawi 16 neitu Julian Brandt theihnghilh lo ila!

Tlarhmaah Niclas Füllkrug a pawimawh ṭhin a, ani hian tun season-ah goal 16 leh assist vawi 10 a nei tawh. Goal kua leh assist vawi 10 nei tawh Marco Reus pawhin Dortmund tana a match hnuhnung berah a theihna pholan a duh ang.