European football roreltu Real Madrid

Champions League leh Real Madrid hi an inzawm tlat em ni chu aw, tih mai tur a ni a, he inelnaah hian vawi 14 zet an champion tawh - champion hnem lama anmahni hnaih bertu AC Milan chu vawi sarih an champion tawh a, Bayern MUnich leh Liverpool te vawi ruk ve ve an champion bawk.

Anmahni hnaih bertute nen pawha an inthlauhzia thlir hian Real ropuizia hrilhfiahin kan awm - Real hian zaninah Borussia Dortmund an hneh a, nomawi an chawi a nih chuan an vawi 15 champion-na a ni ang a, tun hnai kum 10 chhunga vawi ruk an champion-na chiah a ni dawn bawk.

Mahse, Madrid kalkawng hi awlsam anga a lan ang ngawt hi a ni lo. Alfredo Di Stefano vanglaiin, European Cup tih a nih lai, inelna ṭantir lam panga, 1956-1960 inkarah khan an champion vek!

Real hi an reh vang vang a, kum 1966-ah an champion leh chauh. Mahse, Di Stefano, Ferenc Puskas, Paco Gento leh Raymond Kopa te vanglai a liam a, Real hian European champion ni leh turin kum 32 ngawt an nghak tehreng a nih kha - kum 1998 khan an champion leh chauh!

Khatihlaia, "Real vanglai chu black & white hunlai," tia an fiamthu thawh chu an thaichhia a, kum 2000 leh 2002-ah te an champion leh ngat bawk. Mahse, engtiklai pawhin ni a chhuak reng bik lo a, Real hian an nomawi 10-na chawi turin kum 12 dang an nghak.

Real president Florentino Perez-a'n nomawi chawi leh ngei a duh a, sum tam tak sengin ‘Galacticos’ a din a, mahse, chung player langsar leh ropuite chuan Santiago Bernabeu-ah Champions League an hawn thei lo.

Mahse, khua a tlai hmain Perez a harh - player naupang lam a hawi a, 'star ropui' hlir lei lo a, star player chher lamah an rilru an pe. Bayern aṭangin Kroos an la a, Sevilla aṭangin defender rothap Sergio Ramos, Lyon aṭangin Karim Benzema te an lei a, world record transfer fee-in Manchester United aṭangin Cristiano Ronaldo leh Tottenham Hotspur aṭangin Gareth Bale an lei bawk.

Heng player-te an lei lai hian kum 24 hnuai lam vek an ni a, team ropui, thar hlak din an tum a, Brazil aṭangin dollar maktaduai sarih pawh kai loin Marcelo leh Casemiro te an la lut bawk - Real-in tum an nei.

Kum 2014 a herchhuah meuh chuan Real-in Ancelotti kaihhruaina hnuaiah Champions League nomawi an chawi ta nge nge a, Italian coach ropui kiangah coach ni tura inzir mek Zinedine Zidane a awm bawk - hei hi bul ṭanna chauh a ni.

Ancelotti chhuah hnuah Zidane-a'n mawhphurhna lain, season thum chhung a zawnin an champion pui tehreng a nih kha! "European football roreltu chu Real an ni," tih pawhin hnial thei an awm lo - a ropui thlawt.

Ronaldo a chhuak a, Zidane a chhuak a, Real an talbuai phah dawn emaw kan tih laiin an talbuai phah lo. Ancelotti an ko kir a, Italian coach hoin kum 2022 khan a vawi 14-nan an champion - tunah final an lut leh ta a, a vawi 15-na a thlen ngei an beisei.

Real hian Ronaldo, Ramos, Marcelo, Benzema leh Casemiro te an nei tawh lo a, Kroos-a'n chawlh a puang a, Luka Modric lah kum 38 mi a ni ve ta. Mahse, he team hian player ṭhangduang

Vinicius Jr, Jude Bellingham leh Rodrygo te ho an nei a, European football-ah an lalṭhutthleng luah chhunzawm zel an tum.

Ancelotti chuan, "Champions League thunun a, a zawna champion laite kha thlirkir ila, khang hunlai player-te inpekna leh rilru puthmang ropuizia kha sawi loh theih a ni lo.

"Tawnhriat nei ṭha player-ten hma an hruai a, an hruai zel bawk ang. Mahse, tunah chuan an tlem ve ta a, player naupang zawkten mawhphurhna an keng ngam - technical quality an neih piah lamah, Real nihphung an hre tlat a ni," a ti a, zaninah player naupang zawkte nen Champions League nomawi chawi an tum ang.