Dortmund fapa rangkachak Marco Reus

Hliamin a tlak buak fo a, a nih tur ang a nih loh phah tiin an sawi fo ṭhin - mahse, hei vang hian Borussia Dortmund fan-ten Marco Reus an ngainatna a nep phah lo a, an fapa rangkachak a ni a, Dortmund ṭantute chu a zunah an uai zo a ni ber.

Kum 34 mi Reus hian tun season tawp rualin Dortmund a chhuahsan tawh dawn a, kum 12 zet a chamna club hi,"Ka tan chuan engkim a ni," a ti thlawt - mittui nen zaninah a thlah dawn.

German player ṭha mi hian kum 2012 khan Borussia Mönchengladbach aṭangin Dortmund hi a zawm a, club langsar tak takin lakluh tumin hel ṭhin mah se Dortmund tana rinawm a thlang a, nomawi leh sum tam tak aiin hmangaihna a dah chungnung zawk.

Reus hian kum 2013 khan Champions League final a lo khel tawh a, mahse, Bayern Munich an ngam lo. DFB-Pokal (2) leh DFL-Supercup (3) ah te nomawi chawi ve bawk mah se, Bundesliga nomawi chawi loin Dortmund a thlah liam dawn a, Champions League erawh beiseina a la awm!

Dortmund fans mai ni lo, player-ten Reus hi European champion ni chunga thlah ngei an duh ang tih a chiang a, Bundesliga Player of the Season-a vawi thum ngawt thlan tawh forward tan pawh duhthusam a ni ang.

Reus hian May 18 zan khan Signal Iduna Park-a Dortmund tana a match hnuhnung ber chu a lo khel tawh a, 4-0 a Darmstadt an hnehna inkhelah freekick aṭanga goal a khung bakah assist a nei - Wembley khelmualah goal nen, nomawi nen Dortmund fan-te a thlah thei a nih chuan hei lo liama thawnthu ngaihnawm hmawr bawkna ṭha a awm chuang lo ang.