Duhtak Kroos, mangṭha le!

Kum 2014 khan Toni Kroos-a'n Bayern Munich-a a hlawh tihpun a phut a, hetihlaia Bayern president Uli Hoeneß chuan, "I thil phut zat hi i ti mah mah a ni," a ti a, Kroos hian, "Chu chu i ngaihdan a ni mai," a ti a, an club President hi a ngaihdan a ṭawmpui loh thu a sawi.

Hetihlai hian Kroos-a'n kum khatah €4.5mtd vel a hlawh a, a phut zat hi €10mtd niin an sawi - hetihlai hian Bastian Schweinsteiger leh Philipp Lahm ten kum khatah €10mtd an hlawh a, Arjen Robben chuan €7mtd hlawhin, €8mtd-a sang thei dinhmunah a ding mek a, Mario Gotze leh Franck Ribery ten €12mtd an hlawh.

Kroos hi hetihlai hian Bayern-a hlawh tam dan indawta chhiarin 15-na a ni a, hetianga awm reng hi a duh lo. Bayern-in a hlawh phut zat an pek duh loh avangin Real Madrid a pan zui a, tu nge hlim ta zawk inzawh nawn a ngai lo.

Germany international hian Real tan match 464 khelin goal 28 a khungsak a, assist vawi 98 a nei a, Champions League-ah ringawt pawh vawi li a champion a, Bayern a khelh lai nen vawi nga a champion tihna a ni - Real tana a champion vawi lia vawi thumah hian Squad of the season-ah a lang phak.

Bayern erawh a chhuahsan hnuah Champions League nomawi vawi khat chiah an chawi! Real tan hian league nomawi pali, Copa del Rey, Spanish Super Cup (4), UEFA Super Cup (3) leh FIFA Club World Cup (5) a chawi bawk a, club legend ni chungin Santiago Bernabeu a chhuahsan dawn.

Germany tana kum 2014-a World Cup nomawi chawitu Kroos hian Euro 2024 zawh ruala inkhelh a chawlhsan tur thu a puang a, Champions League final hi Real jersey nen chuan a match hnuhnung ber tur a ni dawn tihna a ni.

Kroos-a'n La Liga nomawi chawi chungin league lamah chuan fan-te a thlah tawh a, zaninah Champions League nomawi nen professional football-a a club career chu mangṭha ngei a duh dawn.