A zawnin Luangmual an champion

Ather Pro Volleyball League 2024 hmeichhe champion chu Luangmual an ni. Tualchhung volleyball inelna lianah Luangmual hi a zawnin an champion, nomawi humhim tur hian Diakkawn chu 25-19, 22-25, 25-19, 18-25, 15-12 (3-2) in an hneh.

May 30, Ningani zan kha LPS Arena, Falkland-ah final khelh niin, an inkhel tawlk hle. A tawp lam boruak sang leh hun pawimawh bikah coach Jesse Lalpianpuia leh a naute an che fuh zawk a, a zawna champion thei hmasa ber an ni.

League match lamah team pahnih hi inhnehtawk tak thoin an lo intawng tawh, an inkhelh hmasakah pawh Luangmual hi 3-2 thoin an chak. An inkhelh hmasak a che ṭha tak Lalramliani'n point 22 neiin Kuriz Player of the Match atan a thlang nawn. lawmman dawng lehin, point 22 hmuin tum sarih a tisual.

Luangmual hian kum 2023 khan a vawi khat nan PVL an khel a, state dang player Nipa Barad-i hoin an khelh zawng zawngah an chak vek. Kuminah Mizo hlangin chona an hmachawn a, huaisen takin an nomawi an humhim.

League-ah Luangmualin Serkawn an hneh lo a, semifinal-ah Bungkawn hneh nan set nga an mamawh bawk. Season liam ta aiin a harsa a, KT Enterprise Best Spiker Rami bakah Lalbiakngheti'n final-ah ṭum 16 vaw tlain point li a hloh a, Lalhriatpuii'n point 10 a hmu thung.

Diakkawn hian Luangmual angin PVL khelh hmasak berah champion an tum ngam a, a vanglaia player ṭha bik Vardingliani hoin an inlan - India senior team tana khel phak Vari leh Lalmuanpuii te nei mah se Luangmual aiin an ruh a lo no deuh.

Veikhawr Lalhriatpuii'n a vuak tlak rualin point nga an hmu zawn a, Diakkawnin 21-19-in hnaih leh hman mah se point li hmu zawn lehin Luangmual senior player B. Tlangmawii Varte chuan set khatna an lakna point a thawk chhuak.

Set hnihnaah Aizawl pawn team an insiam rem a, point hniha an inthlauhna humhimin 24-22-a sang zawk an nih laiin Hmingṭhazuali'n a vua a, dan tumtu Biaki'n net khawihin set lakna point an hmu. Mahse, set a zawh rualin team boruak a inthlak ve leh nghal.

Set thumnaah 9-9 a nih laiin Biaki'n a hlap tla a, Luangmualin point li hmu zawnin an kang sang. Lalnunpuii'n vawi hnih vaw tla zawnin Aizawl team-in dinhmun ṭha an luah a, 24-16-in an sang. Diakkawnin point thum hmu zawn ve leh mah se an pawt ding zo tawh lo.

Champion tlang nghal mai thei turin set lina tir lamah Luangmual an fal a, Hmingthazuali'n a vuak kai lo hnuah Biaki'n hlap tla ve thungin 11-6-in an sang. Diakkawnin Hmingthazuali la chhuakin Ngunkhunhniangi an luhtir a, danglamna lian tak a thleng.

Hniangi'n lehlam vuak dangin a hlap tla bawk a, point sarih a thawk chhuak. Kolasib team-in point 11 hmu zawnin 17-11-in an lehpel a, dinhmun ṭha an luah zui. VL Hmangaihzuali'n a hlap tlak ve leh hnuah 24-18-in an sang a, Rami'n vaw kai lovin set hnih ve ve an la.

Ṭan hmun an inthlak rualin Diakkawnin an bei let a, Muani'n beiseina thar siamsakin 11-11 a nih hnuah boruak a sosang zual. Net bulah Hniangi'n point hlohin Luangmual an sang thar leh a, hawi kir leh lo in Nunpuii'n a vuak tlak hnuah Hniangi'n a hlap kai lo va, point thum an hmu zawn.

Point khat hmuh belha champion thei turin hun tha vawi ṭhum an nei a, player langsar ber Rami'n a vuak kai loh hnuah line tawkin inhnial theih takin a hlap tla a, vawi ruk a khelhah point 28 hlohin 81 a hlawh chhuahna a ni a, a champion pui.