Pathianni aṭangin T20 Cricket World Cup

T20 Cricket World Cup chu June 2, Pathianni zing aṭangin khelh ṭan a ni dawn a, zing dar 6:00-ah inelna thlengtu United States-in Grand Prairie Stadium, Texas-ah Canada an hmachhawn dawn. Cricket-a sulhnu chhuan tur nei lo ve ve an ni a, an theihna hriat nan en a chakawm letling.

Zan dar 8:00-ah West Indies leh Papua New Guinea te an khel dawn a, Windies hi tun hnaiah tla hniam mah se T20-ah kher chuan dah hniam an thiang lo. Vawi hnih champion tawh leh inelna thlengtu West Indies-in team nem zawk lakah hian inhampuar an duh ang.

Inelna kalphung

Kuminah team 20 an tel dawn a, kalphung pawh a danglam leh hret. Team zawng zawngin first round aṭangin an khel dawn. Team 20 hi group paliah panga ṭheuhin semdarh an ni a, a sang pahnihin Super 8 an lut dawn.

Group A-ah India, Pakistan, Canada, Ireland leh United States te an awm a, India leh Pakistan inkhel tur hian ngaihven a hlawh dawn. June 9, Pathianni zanah cricket khawvelin New York lam an hawi ang a, India leh Pakistan inkhel an thlir ang. Tun aṭangin New York lamah chuan boruak a awm ṭan a, inelna buatsaihtu lam chuan security a ṭhat tur thu an puang.

Group B-ah England, Australia, Namibia, Scotland leh Oman te an awm a, inelna hnuhnung pahniha champion England leh Australia te khing zo tur an awmin a lang lo. Group C-ah New Zealand, West Indies, Afghanistan, Papua New Guinea leh Uganda te an awm. Team ṭha pathum an awm tak avangin Super 8 lut tur hriatthiam a har.

Group D-ah South Africa, Sri Lanka, Bangladesh, Nepal leh Netherlands te an awm a, Nepal leh Netherlands te hi nem deuh tura ngaih an ni. Team dang pathum hi chu inhneh tawn thei vek an nih avangin result danglam deuh pawh a thleng thei ang.

Engtin zel?

Group tin aṭanga a sang pahnih ṭheuhin Super 8 an lut dawn a, team pariat hi group hnihah ṭhendarh an ni dawn. Vawi khat ṭheuh an inkhel kual ang a, group pahniha sang pahnih ve vein semifinal an lut leh dawn.

Super 8 hi June 19-23 chhungin khelh zawh a ni ang a, semifinal hi June 26-27, 2024-ah khelh a ni dawn. Final hi Kensington Oval, Bridgetown, Barbados-ah June 29, 2024-ah khelh a ni ang. India-in inelna atana inbuatsaih nan zanin dar 8:00 hian Bangladesh nen warm up match an khel dawn a, Men in Blue tan Pakistan nena an in khelhna tur New York khelmual hmelhriatna ṭha tak a ni ang.

Captain Rohit Sharma leh coach Rahul Dravid te chuan inkhelhna tur pitch hmun hi batter-te tan a ṭhat a rin thu an sawi a, run a tam dawn tihna a ni thei ang. Football-a goal tam a hmuhnawm ang chiahin cricket-ah chuan run tam hi a hmuhnawm duh.

India-in June 5, Nilaini zan dar 8:00-ah Ireland hmachhawnin inelna an ṭan dawn a, IPL khel zo Indian player-te inelna hmachhawn turin an inpeih hle. Mahse, kum 2007 hnuah India hi T20 World Cup-ah an la champion lo a, nomawi chawi tur chuan ram lian laka an huaisen a ṭul a dawn a ni.