NBA Finals khel tur Dallas Mavericks

Dallas Mavericks chuan Minnesota Timberwolves lakah 4-1 in best of seven series an la a, an phu ang ngeiin Western Conference champion an ni.

Western Conference champion hian Eastern Conference champion Boston Celtics nen NBA Finals an khel zui leh ang. Best of seven series hmang bawkin a chak an zawng dawn. June 7, Zirtawpni zingah game 1 khelh tur a ni ang.

Nimin zing Western Conference Finals Game 5 inkhelah Dallas Mavericks hian Minnesota Timberwolves hi 124-103 an hneh a, an chak theih nan an player ṭha Luka Doncic leh Kyrie Irving ten an thawhhlawk leh hle.

Slovenian star Doncic-a'n quarter khatna lekah point 20 nei tling nghalin a team chu dinhmun ṭha takah a awm pui a, chawlhlawk an hman meuh chuan Dallas hian 69-40 in hma an hruai fal tawh.

Harsatna lian tawk zui loin an chak tlang a, hun a tawp meuh chuan Doncic leh Irving te hian point 36 ve ve an nei tawh a, hun pawimawh laiah Timberwolves an tho chhuak zo lo.

Mavericks hian kum 2011 khan NBA title an la, a hnu lamah erawh kumin hi NBA Finals an luh lehna hmasa ber a ni a, kum 13 a liam hnuah basketball inelna lian leh ngaihhlut bera champion leh an tum dawn a ni.

Mavericks head coach Jason Kidd chuan, "A bul kan ṭan dan kha a mak ti pawh an awm mai thei, mah se keini chuan Luka-a thil mak tih hi kan hmu fo tawh a, thil pangngai leh ropui takah kan ngai mai zawk.

"Player tinin an khel ṭha em em vek a, chutiang kara point rawn nei nalh nalh thei an awm hi chuan hma kan sawn phah duai ṭhin, tuna kan khelh ang bawk hian NBA Finals khelh kan tum ang," a ti.

Dallas Mavericks khingpui tur Boston Celtics hi record nei ṭha an ni, vawi 17 ngawt an champion tawhin a ṭum 23 nan NBA Finals an khel dawn a ni a, basketball hmuhnawm bik an chhawp chhuak ngei ang.