Champion lai Djokovic a kal zel

Novak Djokovic chuan French Open nomawi a kawl lai humhim ngei a tum a, second round inkhelah Roberto Carballes Baena chu straight set hmanga hnehin hma lam a pan zel.

Serbian star Djokovic hian harsatna lian tham a tawk lo - Paris khawpuia ruah sur karah 6-4, 6-1, 6-2 in a chak a, clay court inelna lianah hian a zawna a vawi 19 nan third round a lut tling ta hial a ni.

French Open vawi thum champion tawh Novak hian season a hmang ṭha tawk lo a, kuminah nomawi a la chawi loh avangin Roland Garros khelh hma khan a lakah beisei neih san a harsa.

Inelna lian an ṭan a, a thiamna leh theihna a la sang tawk tih a takin kan hmu ta zel. Djokovic chuan, "Ka thinlung chhung rilah hian rinna leh beiseina ka la nei reng a, chuvangin Grand Slam champion nih theih ka la inring.

"Beiseina nei lo ni ila chuan ka tan inkhelh hian awmzia a nei tawh lo ang, ka kum ngaihtuah chuan ka hun hnuhnung a ni tih erawh ka pawm a ngai," a ti. Djokovic hi kum 37 mi a ni tawh, a kum rualpui tam zawk chu an chawl tawh hial a ni.

Inkhel dangah Alexander Zverev pawh a chak - Rafael Nadal hnehtu Zverev hian David Goffin chu 7-6 (7-4), 6-2, 6-2 a hnehin third round a inhlangkai ve bawk. A match lehpekah chuan Tallon Griekspoor a hmachhawn ang.

German star Zverev hi seeded parukna pek a ni a, clay court hi a inkhelh thiamna a nih bawk avangin rin hlawh zinga mi a ni. A vawi khat nan major title a beisei leh mek, nomawi chawi tur erawhin hmabak hlen tur a la ngah.

Zverev chuan, "Goffin khan tawnhriat a nei ṭha tawh a, ṭhenkhat laiah kha chuan min chhaih buai hneh khawp mai. A tawpah erawh set hloh loa ka ding tlang thei kha ka lawm," a ti.

Grand Slam hi chawlhkar hnih chhung khelh a ni ṭhin a, a tir lama hun hman rei hian a hnuah nghawng a nei ṭhin. Tournament dangah Zverev hian a tir lama thahrui a hman tam a tuar ṭhin a, kuminah insiamṭhat a tum nasa hle.