June 3 aṭangin KIRTI Mizo naupang theihna fiah dawn

Directorate of Sports and Youth Services (DSYS), Mizoram chuan Ministry of Youth Affairs & Sports hnuaia awm Sports Authority of India North East Regional Centre (SAI NERC) nena ṭangkawpin RG Stadium, Mualpuiah Khelo India Rising Talent Identification (KIRTI) an thleng dawn.

KIRTI hmang hian infiammna panga football, boxing, weightlifting, athletics leh volleyball-a Mizo ṭhalaite theihna fiah a ni dawn. June 3-7, 2024 chhung hian RG Stadium-ah neih a ni dawn a, chawhma dar 9:00-ah ṭan ṭhin a ni ang.

Kum 9-18 inkar tan a tel theih a, aadhaar card keng tur a ni. Fiahna hmachhawnte hnenah digital report card pek an ni ang. Digital report card hi SAI National Centre of Excellence (NCOE) leh Khelo India State Centres of Excellence (KISCE) luh theih nan a ṭangkai thei ang.

India ram hmun hrang hrangah test hi neih a ni dawn a, ram pum huapa ti ṭhate chu infiamna hmanga hlawhtlinna an chan theih nan zirtirna ṭha zawk pek an ni dawn.

Football, boxing, weightlifting, athletics leh volleyball a tui rawlthar/tleirawlte tan mahni theihna fiahna hun ṭha tak a ni.

Zawhfiah duh nei tan phone number 8974558761-ah biak pawh theih a ni a, www.mybharat.gov.in kaltlangin thil kalhmang a enfiah theih bawk.