Sabalenka chak awlsam

French Open hmeichhe champion tura rinkai zinga mi Aryna Sabalenka chuan harsa vak loin third round a lut. Ningani zan second round inkhelah Sabalenka hian a khingpui Moyuka Uchijima chu 6-2, 6-2 in a hneh.

Court Philippe Chatrier-ah world number 2 Sabalenka hian a tir aṭangin buaina a tawk lo, darkar khat leh minute hnih chhung lekin a chak tlang thei a, a tumpui Japanese nula tan thawk lakna hun pawh a siamsak meuh lo tihna a ni.

A match hmasa zawka Erika Andreeva a hneh ṭumin game thum chauh a hloh a, tun ṭumah game li hloh mah se buaina tham a la tling lo, a match lehpekah chuan Paula Badosa a hmachhawn leh ang.

Kum 26 mi Sabalenka hian season ṭha tak a hmang mek, kum tir khan Australian Open nomawi a kawl lai chu a humhim. Clay court inelna lamah pawh Madrid leh Italian Open final a lut.

Mahse, heng inelna pahnihah hian Iga Swiatek a ngam lo ve ve a, pahnihnaah a lungawi a ngai. Paris khawpuiah player pahnih bawk hi rinkai an ni leh a, a tawp lamah match ropui an khel leh a nih pawhin a mak lo ang.

Inkhel dangah Danielle Collins erawh a chak lo. Player ṭha zinga mi, seeded 11-na ni phak Collins hi world number 125 Olga Danilovic lakah 6-7 (3-7), 7-5, 6-4 a chak loin second round-ah a zinkawng a tawp.

Seeded pakuana Jelena Ostapenko pawh a chak lo. Latvian nula hian 2017 khan French Open nomawi hi a lo chawi tawh, tun ṭumah hian rinkai zinga mi ni mah se player hriat hlawh tak ni lem lo Clara Tauson lakah 7-6 (4), 4-6, 6-3 in a chak lo.