Ibrahimovic a dam ta

AC Milan chuan an striker Zlatan Ibrahimovic chu coronavirus lakah a fihlim tak thu an puang a, tun thla ni 17-ah Inter Milan nen match pawimawh an khelh turah Swede striker hi a inlan thei ang.

September thla khan Ibra hian Covid-19 a kai tih hmuhchhuah a ni a, natna nei hran lo mah se enkawl tura dah hran a ni. Khung hran a nih hnua an endikna hmasaah hri lakah hian a filhim nghal mai lo, Zirtawpni erawh kha chuan a dam fel tih puan a ni.

Italian club chuan thuchhuah siamin, "Zlatan Ibrahimovic chu a zawna vawi hnih endik a nih hnuah hri a kai tawh lo, khawpuia damdawi lam thiamte chuan khunghran a ngai tawh lo tih an sawi a, chuvangin chhuah zalen a ni," an ti.

Kum 39 mi Ibra hian season bul a ṭan fuh hle, Europa League leh Serie A lamah match khat ve ve khelin goal thum a khung der tawh - Inter lakah pawh Milan tan innghahna a nih leh ngei a rinawm.

Ibra a dam lai hian season hmasa Serie A pahnihna Inter player Roberto Gagliardini, Radja Nainggolan leh goalkeeper Ionut Radu te erawhin hri hi an la vei mek thung a ni.