Hammers-in Benrahma an rim

Premier League club West Ham chuan Algeria forward Said Benrahma chu Brentford aṭanga lakluh tumin an hel mek a, he thuziak i chhiar meuh chuan an inlalut fel tawh hial mai thei.

Kum 25 mi Benrahma hian season hmasa khan Brentford tan match 46 a khelhah goal 17 khungin vawi 10 assist a nei a, tun season-ah match thum khelin goal hnih a khung leh tawh bawk.  

European top five league-ah transfer bazar khar tawh mah se Premier League club-te hian Championship leh a hnuai lam club aṭangin October 16, zan dar 9:30 thleng player an la lalut thei a ni. 

Hammers hian Bour-nemouth striker Joshua King chu lakluh tumin an lo dawr tawh a, mahse Norway international lakluh an tumna kawngah hian an beisei angin inremna a awm thei lo. 

London club aṭang hian attacking midfielder Felipe Anderson chuan season khat chhung atan loan-in FC Porto a zawm a, midfielder Jack Wilshere chu an chhuah zalen bawk. 

David Moyes-a enkawl team hian senior player 20 chauh an nei mek a, Scottish coach hian centre back pawh lakluh tumin a mit a len mek nia sawi a ni. 

Hammers hian an league match hmasa pahnihah hnehna chang zo lo mah se a hnu match hnihah Wolverhampton Wanders (4-0) leh Leicester City (3-0) an hneh a, an phur vanglai an tawng chho mek.