Kolhi a che ṭha, Bangalore an chak

Indian Premier League-ah Royal Challegers Bangalore-in Chennai Super Kings run 37-in an hneh a, Virat Kohli-a'n thi loin ball 52 a hmachhawn aṭangin run 90 a siam. Inkhel dangah Kolkata Knight Riders-in Inrinni zan khan Kings XI Punjab run hnihin an hneh hram.

Zanin dar 7:30 hian Kolkata Knight Riders leh Royal Challegers Bangalore te an inkhel ang. Team pahnih hian match ruk khelh aṭangin point riat ve ve an hmu tawh a ni.

Kolkata-in vuak hmasak an thlang a, Shubaman Gill (57) leh Dinesh Karthik (58*) ten half century an siam zarah run 164 an siam. Kings XI-in bul an ṭan ṭha a, opener pahnih KL Rahul (74) leh Mayank Agarwal (56) ten half century an siam nghal ve ve a, Sheikh Zayed Stadium-ah inkhel a nung hle.

Opener pahnih thih hnuah Punjab batsman-te an che chhe zui a, chutihrualin over khat chiah a awm tawh tihin run 151/4 an siam phak avangin chak thei dinhmunah an la ding. Punjab hian beiseina nei zelin ball hnih chiah a awm tihin run ruk chiah an mamawh tawh a, Narine hian Mangdeep Singh a vawm hlum a, ball tawp berah Glen Maxwell-a'n four vaw chhuak mah se Kolkata run hnihin an chak ta tho.

Virat Kohli-a'n tun season IPL bul ṭan ṭha lo mah se season chanve chhoah erawh a thiamna hmuh tur a awm leh ta. Dubai International Stadium-ah Virat Kohli hian run 90 a siam a, ball 52 chauh hmachhawnin a thi lo bawk.

Royal Challengers hi an bat hmasa a, run 169/4 an siam. Chennai Super Kings tan target um phak theih ni mah se Bangalore bowler Chris Morris (19/3) leh Washington Sundar (16/2) an ngam lo. Chennai hian over 20-ah run 132/8 chauh an siam a, Royal Challegers Bangalore run 37-in an chak.