A vawi 15 nana Europe roreltu Real Madrid!
Champions League-a English club champion ngun ber chu Liverpool an ni a, nomawi paruk an nei - an induh phah a, khawvel ngaihven English football-ah anni aia ropui awm loa an ngaihna chhan lian tak pawh a ni.
Ni e, European football-a vawi ruk ngawt champion theih chu a ropui a, inchhuanpui tham pawh a ni reng a ni. Mahse, chu aia record ropui zawk, khum emaw nih rual tur pawha hun tam mamawh tur chu Real Madrid-in Champions League nomawi vawi 15 ngawt an chawi ta a hi a ni - a mak, ni lo, a rapthlak zawk asin, tih hial tur a ni lo maw?
Inrinni zan khan Champions League final-ah Real Madrid chuan 2-0 in Borussia Dortmund an hneh a, European football-a club inelna sang berah a vawi 15 nan an champion. I chhiar dik e, a vawi 15 nan a ni an champion ni!
Real Madrid tan Dani Carvajal leh Vinícius Júnior ten goal khat ve ve an khung a, Dortmund-in a chhanletna tur an neih loh avangin an tlawm - German club hi kum 2013 khan Wembley-ah vek hian Champions League final khelin, an lo tlawm tawh bawk.
Dortmund an huai
Wembley Stadium-a team pahnih intawn hmaa rin hlawh zawk chu Real an ni a, khawvelin Dortmund lam a hawi ngam lo. Mahse, inkhelh hmain Dortmund boss Edin Terzic chuan, huaisen taka an theihna zawng zawng nena an beih chuan, chance an neih tur thu a sawi.
He team hi Paris Saint-Germain, AC Milan leh Newcastle United te nen group khata awm chunga hmahruaitu ni thei kha an ni a, an final kalkawngah Atlético Madrid leh PSG an pet chhuak zui bawk - hei vang hian inrintawkna an nei.
Wembley-ah pawh rin hlawh lo zawk chungin Dortmund khel a nung zawk a, a pawi ber erawh a hmawr an bawk thei lo chu a ni. German club tan Karim Adeyemi-a'n chance a nei hma a, mahse, 'shot' nghal mai lo a, Thibaut Courtois a tlan hel te te hnuah uiawm takin a khung lo.
Minute 23-naa Niclas Füllkrug chance hlohte kha aw - Marcel Sabitzer-a siamsak chu tlu chungin tlawh goal a tum a, mahse, hei hian post a per. Dortmund fans an au ṭhawt a, Real fan-te an thaw huai!
A pawi zo ta
Second half ṭantir lamah Füllkrug-a'n chance duhawm a nei a, mahse, German striker ball tauh ṭha tak hi Courtois-a'n world class keeper a nih pholan nan a mansak a, Carlo Ancelotti-a'n Andriy Lunin aia a thlan chhan hmuh tirin kan awm bawk.
Dortmund-in inkhel thunun mahse, a pawimawh ber goal an khung thei lo a, Champions League 'expert' tih hial khawpa mawi Real game a ṭha tulh tulh thung - Spanish club hian game hmuhnawm pho chhuak lo mah se, a hun têah an rah ṭhin.
I awih loh chuan Jurgen Klopp zawt rawh u - German coach hian Champions League final-ah Liverpool enkawl chungin Real hi vawi hnih a ngam lo a, a bul ṭan ṭha zawk an ni ve ve! Tunah chuan zawh belh tur Dortmund an awm leh ta.
Terzic-a'n a hmawr bawk hleithei lo Adeyemi la chhuakin, tawnhriat nei ṭha Marco Reus a luhtir a, Dortmund tana a match hnuhnung ber kheltu hmangin game thlak danglam theih an inbeisei.
A hmawr bawktu
Reus lut mah se, Dortmund-in an mamawh ber goal an hlawh chhuak thei chuang lo. Tawnhriat nei ṭha Real an talbuai duh lo a, minute 74-naah goal an hlawh chhuak ta nge nge - Toni Kroos a inlar a, German midfielder corner pet aṭanga ball kal chu Dani Carvajal-a'n a tauh lut.
Wembley stadium chei eng (yellow) vek thei khawpa pungkhawm Dortmund fans an reh ṭhiap a, khel ṭha em em mai defender Mat Hummels pawhin kawng dawm meuhin khaw dang hawi zai a rel lo - Real nunrawnna an tem ṭan tih a hria.
Real an phur sawt a, goal an khung hnuah Jude Bellingham leh Kroos ten chance duhawm an nei ve leh a, mahse, Dortmund an vannei. Minute 83-na a ni a, Dortmund an ṭang tlang zo lo.
Dortmund tan Chelsea aṭanga loan-a an hawh left back Ian Maatsen a chesual a, tlarhnung lam a ball pekah Hummels leh Nico Schlotterbeck inringthulin, Bellingham chuan ball hi a lo chang - English midfielder hian Vinicus tan a siamsak zui a, Brazilian forward-in chak nemnghehna a khung. Goal hnih chhuah hnuah German striker Fullkrug-a'n a tauh goal-ah a inngai a, mah se offside vangin pawm a ni lo - Dortmund beiseina a thamral a, 2-0 a chakin Real Madrid an champion.