Hey Jude - zan duhawm hmangtu chu!

Jude Bellingham-a'n Borussia Dortmund aṭangin Real Madrid a pan a, La Liga nomawi a chawi hnuah Champions League nomawi a chawi leh ta - hei aia zan duhawm zawk a tan a awm loh thu a sawi zui.

Bellingham chuan, "Hetiang ang game boruak sang leh level sanga khelh hi ka duhthusam a ni fo ṭhin. Harsatna tam takin min tlak buak chang hi chuan, eng vanga hetiang taka bei nge maw ka nih le, tiin ka inzawt ṭhin - mahse, zanin anga hun duhawm hian ka beisei thil hlutzia min hriat nawntir a ni.

"Season duhthusam tia sawi theih a ni a, ṭawngkamin ka sawi thiam lo. Ka tan chuan zan duhawm ber a ni," a ti a, Champions League nomawi a chawi thei chu a hlim hle.

June thla tawp lama kum 21 tling tur Bellingham hian season ṭan dawn khan final-a an hneh tak Dortmund chhuahsanin, Real hi a pan a, season hmasa Bundesliga player of the season hi La Liga lamah pawh player of the season a ni.

Champions League final-ah khel ṭha tawk lo mah se, hun pawimawhah inlarin assist a nei. Tun season inelna hrang hrangah match 42 khela goal 23 khungin, assist vawi 13 a nei.

Bellingham hian a club hlui Dortmund chungchang sawi zuiin, "A nihna takah chuan first half kha an khel ṭha zawk. 2-0 emaw 3-0 emawa hmahruai thei zawk an ni hial ang. Mahse, kan paukhauh tlat a, kan 'comeback' thei a ni.

"Real hi ka tan an hlu em em a, chutiang chiah chuan Dortmund pawh hi ka tan an hlu hle. Dortmund zawm lo ila, tun dinhmun hi ka thleng lo ang tih ka ring a, ka tana an thiltih avangin ka lawm kumkhua ang," a ti.

Bellingham hi a nu leh pa leh a unaupa ten a hmunah an ṭawiawm a, Bellingham nu Denise hi Jose Mourinho ngaisangtu niin, Wembley-a TV pundit anga tel ve Portuguese coach hi a nu nen thla a lak duntir a ni.