King Carlo - ropuinate nei tlak i ni e!

Khawvel coach ropui sawi a nih apiangin Carlo Ancelotti hming lam rik a ni zel tawh dawn - amah ngaisangtuten 'King Carlo' tih meuha hming lem an pek coach hian Real Madrid chu Champions League nomawi a chawipui leh ta.

Ancelotti tan Champions League nomawi vawi nga a chawina chiah a ni a, coach zingah Champions League champion ngun ber a ni - AC Milan chu vawi hnih a lo champion pui tawh a, Real hi vawi thum a champion pui ta chiah bawk.

Italian coach hian player a nih laiin Champions League nomawi hi vawi hnih a lo chawi tawh bawk a, player leh coach ang phei chuan vawi sarih a champion tawh tihna a ni - club-te nena khaikhin pawhin champion tam lamah Real Madrid chiah a phak lo!

Ancelotti chuan inkhel thlirkirin, "Kan khelh danah ka lawm lo a, hmun hlauhawm laiah ball kan hloh nasa ṭhin hle. Dortmund kha an duh ang takin kan khelhtir a, an duhthala hmun awl pein, an duh ang taka ball an inpek kualna chance kan siamsak.

"Chu chu an hlauhawmna ber a ni a, a harsa hle. First half-ah khan kan bet tlawk tlawk a, second half-ah zawi muanga insiamṭhain, kan khel ṭha ta deuh," a ti a, an khingpui Dortmund a fak.

AC Milan, Chelsea, Paris Saint-Germain leh Bayern Munich pawh lo enkawl tawhtu King Carlo chuan, "Mumang ang mai a ni a, mahse, a tak ram ngei erawh a ni si," a ti zui a, a vawi nga nana Champions League nomawi a chawi chu a ngaihlu hle.

Ancelotti hian AC Milan tan Serie A, Coppa Italia, Supercoppa Italiana, Champions League (2), UEFA Super Cup (2) leh FIFA Club World Cup nomawi a chawi a, Chelsea chu Premier League, FA Cup leh Communitu Shield-ah a champion pui bawk.

PSG tan Ligue 1 nomawi chawi tawhin, Bayern chu Bundesliga leh German Super Cup (2) ah a champion pui tawh a, Real Madrid hi La Liga (2), Copa del Rey (2), Spanish Super Cup (2), Champions League (3), UEFA Super Cup (2) leh FIFA Club World Cup (2) ah a champion pui.