Kan theihna kan pholang - Edin Terzic

Borussia Dortmund-in Champions League final-ah Real Madrid ngam lo mah se, coach Edin Terzic erawhin mittui karah lawmna a hmu a, chak an phu thu a sawi bawk.

Kum 41 mi coach chuan, "Game mawi tak kan khel a, 2-0 a tlawm ringawt kha chu kan phu bik lo. Inkhel hamrik a rik rualin, final khel tur ringawta he hmun pan hi kan ni lo a, nomawi chawi tum kan ni tih kan pholang.

"Kan ti ṭha takzet a, chutihrual chuan Real kha a hunah tak an rawn che chat zel. Chu erawh keini tih ve theih loh a ni thung," a ti a, a hun taka an che ṭha ṭhin chu Real an tluk lohna a nih thu a sawi.

Terzic chuan sawi zawmin, "Game ropui tak kan pho chhuak a, chutihrual chuan a vawi 15-nana Real an champion chhan kan hmu tel bawk. An thiltihah an hlawhtling zel a, keini erawh a ni ve lo.

"Nomawi kan hnaih takzet a, kan inthlauhna kha a lian lo hle. Real ka lawmpui takzet a, heti zat nomawi chawi tawh chunga champion duhna thinlung an nei reng thei hi ropui ka ti," a ti.

Dortmund scout ni chunga a coaching career zawh ṭantu Terzic a vanduai ṭhin hle. Kum 2021 khan coach lailawk a nih laiin Dortmund hi DFB-Pokal-ah a champion pui a, hemi hnuah erawh nomawi a chawi leh tawh lo - a teuh erawh a teuh ṭhin!

Season hmasa khan Bundesliga-ah pahnihna an ni a, champion tura an match hnuhnung bera chak mai a tawk laiin Mainz 05 chu 2-2 in an inhnehtawkpui a, goal difference-a dinhmun ṭha zawk Bayern Munich an champion daih.

Terzic hian, "Season hmasa khan uiawm takin league nomawi kan chawi lo a, mahse, kha kha hlawhtling tura kan zinkawng inṭanna a ni," tiin a sawi a, mahse, Champions League final-ah uiawm takin an tlawm leh ta.

Dortmund defender Mats Hummels chuan, "Huaisen takin, kan thinlung zawng zawng nen kan khel a, football quality sang tak kan pho chhuak. Goal kan khung thei lo a, Real erawh an tih fo ṭhin angin, a hunah tak an par ta si a ni," tiin a sawi.