A nih phawt mai aw Reus!

Real-in Toni Kroos an thlah a, Dortmund-in ui takin Marco Reus an thlah ve bawk. German midfielder erawh a la chawl dawn lo a, mahse, a professional career-a hun tam zawk a hmanna club hi a chhuahsan dawn.

Kroos angin Reus-a'n final-ah bul ṭan lo mah se, bench aṭanga luhtir a ni a, danglamna erawh a thlen thei lo. Reus hi West Ham nen sawizawm a ni a, Major League Soccer club St. Louis City leh Saudi Arabia te sawi rik an ni bawk.

A vanglaia Arsenal, Manchester United, Bayern Munich, Liverpool leh Chelsea te sawmna hnar a, Dortmund tana rinawm thlangtu hian tun season-ah match 42 khela goal kua khungin, assist vawi 10 a nei a, a la rintlak hle.

Reus hian Dortmund-ah DFB-Pokal (2) leh German Super Cup (3) nomawi a chawi a, Champions League final vawi hnih luhpui mah se, an chak zo lo ve ve a, a hmangaih club tana rinawm a thlan avangin a hlawhtlin tur angin a hlawhtling tawk lo.