A vawi thum nan Hunthar an champion

Tualchhung volleyball inelna liah leh ngaihhlut ber - Ather Pro Volleyball League 2024 chu a hmawr bawk a ni ta a, team ṭha leh hmuhnawm Hunthar chuan a vawi thum nan nomawi an chawi a, anmahni elphak reng an awm lo.

LPS Arena, Falkland-ah May 31, Zirtawpni zan khan final khelh niin, league round lama chak kim Hunthar hian an khingpui Tuichangral chu 23-25, 25-23, 25-23, 25-23 (3-1) in an hneh a, coach VL Malsawma Renthlei leh a naute an chungnung hle.

Point hnuhnung ber thawk chhuaktu Anurag Rawat chuan ṭum 36 a hlap dik a, a vawi nga nan Kuriz Player of the Match atan an thlang. An champion theih nana thawhhlawwk tak Fabian Lallunghnema chu Mizo Best Player atan thlan a ni bawk.

Final chu

A tirah Tuichangral an che fuh hmasa zawk, player chah luh Sonu Jakhar leh Saidingpuia Sailo ten hun pawimawhah point hlawh chhuakin an chungnung zawk an ni a, point inthlau lo tak chungin set khatna an la zui.

Set hnihnaah an inum tawk zual hle, point inzat an neih laiin Anurag-a'n tla zawnin 21-18-in an kalsan. Fabian Lallunghnema'n a hlap tlak ve leh hnuah point lia inthlau chungin Huntharin set la turin point khat chiah an mamawh a, a harsa chhunzawm tawh lo.

Tawnhriat ngah Huntharin hun pawimawhah danglamna an thlentir zui leh a, 23-23 a nih laiin Lalnunfela'n rang takin a vaw tla a, khaw chhak team-in nih rual thei tura hun tha an neih an ti hlawhtling lo a, Fabian-a'n remchang neih phahin na taka a hlap an la thei lo a ni.

Tuichangal tan chet sual a thiang tawh lo a, set lina laihawl thlengin beiseiawm takin an nawr let a, Zomuana leh Sonu chuan point hmu zawnin 18-14-in an sang. A hmain dik tawk loin Huntharin point an hloh a, coach Sawma'n court sir lamah borak a ti sang viau bawk.

Hunthar insiamṭhain setter Remsangzuala'n a hui tlak hnuah Tuichangralin C. Lalhriatpuia service an la thei lo a, 18-18-in an nih rual. Tuichangral kal hma nawn lehin Saitea'n a vuak hnuah Fabian-a hlap dang tlain 21-19-in an sang leh.

A tawp dawnah Zomuana'n point khat hmuh belhin Anurag-a'n a vaw kai lo bawk a, mahse, 24-23 a nih laiin Delhi tlangval hian lehlam ban pharna chung aṭangin a hlap tla a; ṭum khat aia tam champion thei awm chhun Huntharin a vawi thum nan nomawi an la.

Hunthar chungnung

Pro Volleyball League hi kum 2016 aṭangin khelh ṭan a ni a, champion hmasa ber chu Anastasia Electric Veng an ni, a hnuah a kum zawnin Hunthar an champion, volleyball ngaina veng an nih avangin a zawna an champion hi a mak hran lo.

Hunthar hnuah Chhinga Veng Spikers, Durtlang North leh Thutak Nunpuitu Team (TNT) ten hlawhtlinna an chang a, season hmasa khan Hunthar hian final lut mah se nomawi inchuhna inkhelah hian TNT an ngam lo a ni.

Kuminah coach VL Malsawma Renthlei hoin an inlan. Tournament an ṭan dawn khan Sawma hian season hmasa aia an inbuatsaihna a ṭhat zawk thu Vanglaini a hrilh a, a thu sawi hi a dik - league round an khelh aṭanga a tawp thelngin an chungnung.

Hunthar champion puitu Sawma chuan, "Volleyball a ka hun tawp ṭha taka ka hmang thei hi ka lawm, duhin chak hle mah ila ka kum a tam ve tawh a, ka hun a liam ve tawh, season dangah chuan a entu ka ni ve tawh ang, taksa in a tlin tawh lo a ni.

"Keimah chawl mah ila Hunthar Volleyball erawhin par a chhuang zel ang," tiin Vanglaini a hrilh. Hunthar ho an coaching staff pawh an veng min leh sa vek an ni a, player zingah panga chu an veng mi an ni bawk - an tan nomawi hi a hlu zual dawn tih a chiang.

Hunthar hian volleyball an ngaina a, ram pum huapa chhut pawhin tualchhung volleyball chawisangtu leh vawrh lartu an ni. PVL-ah anni chauh hi vawi khat aia tam champion thei niin, an sulhnu hi a chungnung fal hle a ni.